NOVA IORKE, 27 setembru 2024 (TATOLI) – Illa Salomão liuhusi nia Ministru Governasaun Tradisionál Pás no Ekliziastika Jaimie Lency Vokia, sesta ne’e, hasoru malu ho Sekretáriu Jerál organizasaun intergovernamentál g7+ Helder da Costa hodi ko’alia kona-ba tempu-besik Illa Salomão sei halo ratifikasaun ba Charter g7+ nian.
“Ita simu vizita ida husi Illa Salomão, ami ko’alia kona-ba preparasaun Governu Illa Salomão nian atu aprezenta dosier ida kona-ba sira-nia preparasaun atu ratifika g7+ nia karta ou Charter,” Helder hateten ba Agência TATOLI iha edifísiu g7+ Nova Iorke.
Nia dehan, Illa Salomão sei inisia sira-nia orsamentu jerál Estadu iha loron 04 fulan-novembru, Governu sei buka meiu atu ratifika lalais karta g7+ nian.
“Sira mai ne’e ho Ministru na’in lima, sira mai partisipa iha reuniaun Asembleia Jerál Nasaun Unida nian. Nune’e sira promete bainhira fila sei halo aprezentasaun ida iha sira-nia Konsellu-Ministru nune’e bele ratifika lalais karta g7+ nian iha Ilha Salomão,” nia haktuir.
Alende ne’e, Burundi nasaun ida iha kontinente Áfrika konsege halo ona prosesu ratifikasaun ba karta g7+.
“Atu informa mós katak, nasaun ida naran Burundi membru g7+ nian halo ona ratifikasaun ba karta g7+ nian, sira-nia Parlamentu Nasionál aprova ona ho unanimidade no daudaun ne’e hein de’it sira-nia Prezidente Repúblika atu promulga,” nia akresenta.
Tanba ne’e, iha tinan-2024, nasaun rua mak sei kompleta prosesu ratifikasaun ba karta g7+ nian ne’ebé nasaun membru sira bele sente hanesan na’in mós ba g7+.
Jornalista: Hortencio Sanchez
Editór: Rafael Ximenes de A. Belo
