Mane ida lakon vida iha otél Jeale Hudi-Laran hafoin halo relasaun
DILI, 27 setembru 2024 (TATOLI) – Mane ida ho idade 56 ne’ebé suspeita servisu iha Ministériu Agrikultura Peska, Pekuaria no Floresta (MAPPF) hakotu iis hafoin halo relasaun seksuál ho feto ida iha Otél Jeale Hudi-Laran, Suku Bairro-Pite, Postu Administrativu Dom Aleixo, Munisípiu Dili.
Tuir informasaun ne’ebé Tatoli hetan katak sidadaun na’in-rua ne’e lori malu ba otél iha tuku 7 dadeer, sesta, ohin. Vítima ida-ne’e suspeita servisu iha MAPPF no feto ne’e servisu nudar cleaner.
Sidadaun na’in-rua ne’e tama ba arredór otél ho motorizada ida, sira para iha otél oin no uza maskara metin inklui uza kapasete iha ulun, sira mai rejista tiha naran, depois sira tama ba fatin deskansa nian, la to’o oras rua, sidadaun feto ne’e tenta atu halai sai hosi otél, mas la konsege tanba traballadór otél mak trava tanba deskonfia katak nia halo buat ruma laloos iha otél laran.
Bainhira traballadór sira trava tiha sidadaun feto ne’e, traballadór husi otél, tama ba kuartu laran, haree katak mane mak toba hela iha rai ho ropa laiha no iis laiha.
Haree ba situasaun ne’e, traballadór otél ne’e diretamente kontatu kedas ba polísia informasaun no ba direta fatin akontesimentu.
Iha tuku 10:00 dadeer, Polísia Departamentu Investigasaun Kriminál (DIK) Nasionál ba kedan lokál akontesimentu hodi haree situasaun referida no haree katak sidadaun mane ne’e lakon ona vida no polísia asegura kedan no sidadaun feto ne’e lori ba DIK Nasionál Caicoli hodi submete ba prosesu identifikasaun. Enkuantu sidadaun mane ne’e nia isin mate husi parte Forensiku hafalun ho plástiku kor azul tula direta ba Ospitál Nasionál Guido Valadares Dili hodi submete ba autopsia.
Iha prosesu transladasaun mate isin sidadaun mane ne’e, lahetan akompanamentu husi nia família tanba família seidauk hetan informasaun.
Komandante PNTL Munisípiu Dili, Superintendente Xefe, Polísia Orlando Gomes, hateten kazu ida-ne’e, Departamentu Investigasaun mak halo atendimentu.
“Kazu ne’e sira Forensik Nasionál mak atende, ohin tula ona mate isin ba HNGV hodi halo autopsia”, Orlando hateten ba Tatoli via telefone, sesta nee.
Orlando dehan, informasaun ne’ebé iha, sidadaun mane suspeitadu halo relasaun ho feto ida mak mate iha fatin.
“Maibé kazu ne’e la’os ami mak kaer, sira Forensik mak atende ona no lori ona mate isin ba autopsia”, nia konklui.
Jornalista: Natalino Costa
Editór : Zezito Silva
