NOVA IORKE, 27 setembru 2024 (TATOLI) – Ministru Negósiu Estranjeiru no Kooperasaun (MNEK), Bendito dos Santos Freitas, depozita, formalmente, Timor-Leste nia Instrumentu ratifikasaun ba akordu tuir konvensaun Nasaun Unida kona-ba Lei Tasi nian ba Organizasaun Nasaun Unida (ONU).
Dokumentu referidu, simu direta hsi Sub-Sekretáriu-Jerál Interinu ba Asuntu Jurídiku no Konsellu Jurídiku ONU nian, Stephen D. Mathias, iha okazisaun sesaun
Asembleia Jerál ONU ba dala-79, iha Nova lorke.
“Depoizde semana kotuk Parlamentu Nasionál Timor-Leste ratifika dokumentu ligadu ba altu mar (BBNJ), ohin, ofisialmente Ministru Negósiu Estranjeiru no Kooperasaun Repúblika Demokrátika Timor-Leste, Bendito Freitas, depozita, formalmente dokumentu ne’e ba Nasaun Unida,” Ministru Bendito hateten ba Agência TATOLI hafoin entrega dokumentu ne’e.
Parlamentu Nasionál Timor-Leste, halo ratifikasaun ba akordu referidu iha loron 17 fulan-setembru liubá, nu’udar instrumentu internasionál ida tuir konvensaun Nasaun Unida kona-ba Lei Tasi nian no mós kona-ba Konvervasaun no Sustentável Uza Diversidade Biolójika Tasi nian husi área ne’ebé haleu Jurisdikasaun Nasionál (ka akordu Biodiversity Beyond National Jurisdiction-BBNJ) durante tratadu ONU 2024.
Timor-Leste nia ratifikasaun ba Akordu BBNJ nu’udar realizasaun signifikativa ida iha konservasaun no jestaun sustentável ba rekursu tasi nian hasoru mudansa klimátika no degradasaun tasi nian.
Ida-ne’e mós hanesan onra ida ba Timor-Leste atu hamutuk ho nasaun sira ne’ebé ratifika ona akordu referidu no husu ba sira seluk ne’ebé seidauk atu bele ratifika.
Timor-Leste kompromete atu kaer-metin prinsípiu sira husi Akordu BBNJ, promove kolaborasaun sientífika, no defende prátika sustentável sira hodi salvaguarda biodiversidade tasi nian.
Jornalista: Hortencio Sanchez
Editór: Rafael Ximenes de A. Belo
