NOVA IORKE, 26 setembru 2024 (TATOLI) – Nasaun membru organizasaun intergovernamentál g7+ halibur malu hamutuk iha Nova Iorke hodi diskute asuntu importante tolu hodi haree ba futuru organizasaun nian.
Diskusaun ba asuntu tolu ne’e mosu iha ámbitu simeira nivel aas g7+ nian ne’ebé hala’o iha edifisiu Organizasaun Nasaun Unida (ONU) Nova Iorke, ohin.
“Líder nasaun membru sira diskute asuntu tolu hanesan, ida oinsá haree ba oin g7+ nian, haree husi multilateralizmu ne’ebé falla iha mundu no sira hotu haree g7+ hanesan grupu ida-ne’ebé iha esperansa bele halibur nasaun pos-konflitu sira, hanesan plataforma di’ak ida hodi fahe esperiénsia ba malu,” Sekretáriu Jerál g7+ Helder da Costa hateten ba Agência TATOLI iha Nova Iorke.
Pontu segundu ko’alia kona-ba importánsia mantein pás no estabilidade iha nasaun membru idaidak.
Pontu ikus liu ko’alia kona-ba mudansa klimátika ne’ebé daudaun ne’e nasaun barak hasoru.
“Husi ne’e nassun membru sira konsidera g7+ nu’udar plataforma ida bele servisu hamutuk ho Prezidénsia COP28 ne’ebé tinan kotuk prezide hosi Uni Arabe Emirates (UEA) no Prezidente COP29 mai Aziabazan novembru mai sei hala’o konferénsia boot. g7+ tenke servisu hamutuk ho sira para lori dezafiu ne’ebé nasaun sira ne’ebé enfrenta mudansa klimátika sira bele tau atensaun nafatin,” Helder tenik.
Alende ne’e nasaun membru sira diskute mós kona-ba poder no alvu ba rekonsiliassun no nasaun 20 ne’ebé hamahan aan iha g7+ hakarak apriende rekonsiliasaun husi Timor-Leste.
“Sira haree ita-nia Primeiru-Ministru ko’alia ho paixaun, no ema barak haree nia respeita tebes, nune’e sira hakarak apriende tebes esperiénsia Timor-Leste nian kona-ba rekonsiliasaun,” nia katak.
Durante nasaun membru g7+ halibur hamutuk hatudu solidariade ba malu no hatudu espiritu atu koopera malu.
“Nasaun membru sira hamutuk unidade tebes, sira hotu iha simeira ne’e kontente simu konvite husi Primeiru-Ministru katak tinan oin mai Timor-Leste sai uma-na’in ba enkontru Ministru Negósiu Estranjeiru g7+ nian no selebra tinan-15 ezistensia g7+,” nia hakotu.
Jornalista: Hortencio Sanchez
Editór: Rafael Ximenes de A. Belo
