DILI, 27 setembru 2024 (TATOLI)—Membru Parlamentu Nasionál (PN), liuhusi Deputada PLP, Maria Angelina Sarmento, kontinua husu sidadaun hotu atu iha konsiénsia labele soe lixu arbiru maibé soe lixu iha kaixote lixu iha lixeiru sira-ne’ebé Governu koloka ona iha kapitál Dili.
“So’e lixu arbiru kontribui inundasaun iha tempu udan. Entaun, ita haree daudaun Governu sosa ona kaixote lixu kuaze distribui barak iha Dili laran maibé sira la ba kontrola. Fatin ne’ebé mak tau hela kixote lixu iha lixeiru ne’e, lixu kontinua soe iha kaixote lixu nia oin. Hanoin, la’ós responsabilidade serbisu ekipa saneamentu munisípiu Dili nian de’it maibé sidadaun hotu tenke konsiente soe lixu iha lixeiru ne’ebé prepara ona,” Nia hateten ba jornalista sira iha resintu PN, sesta ne’e
Tanba ne’e, nia husu atu sidadaun hotu presiza iha konsiénsia hodi labele so’e lixu arbiru tanba ne’e kontribui ba inundasaun iha tempu udan, tanba lixu sira-ne’e tama fali baleta ka bee-dalan nia laran, bee suli tuir bee-dalan ne’e la másimu entaun hamosu inundasaun.
Deputada CNRT, Cedelísia Faria dos Santos, husu autoridade munisípiu Dili atu halo fila-fali estudu didi’ak bainhira tau kaixote lixu iha lixeiru ne’ebé Governu koloka iha bairru sira iha Kapitál Dili.
Tanba, nia observa, iha área sa’e ba to’o iha Fatuahi nian komunidade hela uituan de’it maibé tau kaixote lixu ka lixeiru barak loos, enkuantu iha área balun hanesan iha Bebonuk nian komunidade hela iha ne’eba ne’e barak maibé lixeiru ne’e ladún koloka barak iha ne’eba.
Aleinde ne’e, nia nota mós katak lixeiru balun tau komunidade la soe lixu iha laran maibé soe arbiru fali, nune’e husu Ministériu Adminitrasaun Estatál (MAE) atu orienta líder komunidade sira atu kontrola mós iha bairru ida-idak.
Deputadu KHUNTO, Luis Roberto, husu atu Governu liuhusi entidade kompetente fó sansaun ba sidadaun sira-ne’ebé to’o oras ne’e, sira kontinua soe lixu arbiru.
Jornalista : Nelson de Sousa
Editór : Cancio Ximenes
