COVALIMA, 30 Setembru 2024 (TATOLI) – Prezidente Komisaun Organizadora Vizita Papa Francisco husi munisípiu Covalima, Miguel Armada Cardoso, hateten nia parte seidauk aprezenta relatóriu ezekusaun orsamentu hamutuk rihun $40 ne’ebé alokadu husi Governu sentrál.
Prezidente Autoridade Covalima ne’e dehan katak peregrinu husi postu administrativu Fatululik, Fatumea, Fohorem, Tilomar, Maucatar, Suai no Zumalai peregrinu hamutuk 4.500 ne’ebé rejistu hodi partisipa selebrasaun misa solene ne’ebé prezide husi Sua Santidade Papa, iha loron 10 Setembru, iha Tasi-Tolu, Dili.
“Orsamentu ne’ebé Governu sentrál aloka mai Covalima ezekuta de’it ba item konsumu hodi fó han ba ita-nia peregrinu sira ne’ebé partisipa selebrasaun misa solene”, Miguel Armada Cardoso realsa ohin.
Autoridade ne’e dehan, daudaun ne’e, Covalima seidauk aprezenta relatóriu ezekusaun orsamentu, tanba ladauk halo enkontru enserramentu ba komisaun organizadora ba vizita Sua Santidade Papa Francisco, tanba liuhusi enkontru ne’e mak bele klarifika didi’ak kona-ba utilizasaun orsamentu.
Prezidente ne’e dehan enkontru enserramentu komisaun organizadora ne’e sei envolve husi PAM rasik, padre pároko husi parókia haat, Komandante PNTL no seluk tan.
Nia salienta katak peregrinu husi Covalima dezloka bá Dili iha 08 Setembru no Ministériu Petróleu no Rekursu Minerál mak responsabiliza relatóriu ezekusaun orsamentu Covalima nian.
Jornalista: Celestina Teles
Editora: Maria Auxiliadora
