DILI, 30 setembru 2024 (TATOLI)—Prezidente Repúblika, José Ramos Horta, hamutuk ho Governu liuhusi Ministériu Justisa, Ministériu Saúde, Ministériu Solidariedade Sosiál no Inkluzaun ho kolaborasaun ho Fundu Nasaun Unida ba Labarik no Governu Austrália lansa ofisialmente projetu rejistu ba labarik ho forma móvel iha Baucau, Dili, Ermera, Liquiça no Viqueque iha jardin ba labarik iha Palásiu Prezidensiál, Bairru Pite.
PR Horta hateten, lansamentu ne’e rejista identidade labarik sira nu’udar baze esensiál hodi garante sira-nia direitu ba naran, nasionalidade no identidade.
“Parabens ba Governu ho nia parseiru sira ba dezenvolvimentu ne’ebé inisía prosesu rejistu ba labarik sira iha Timor-Leste,” Xefe Estadu hato’o iha nia diskursu, segunda ne’e.
PR agradese mós ba parseiru internasionál Japaun, Austrália, Estadu Unidu Amérika, Uniaun Europeia no Nova Zelandia ne’ebé fornese apoiu hamutuk ho doadór sira seluk sempre koloka kestaun relasiona ho direitu ba labarik no feto.
Ministru Justisa, Sergio Hornai, hateten objetivu husi lansamentu ne’e atu rejista labarik sira hotu iha ne’ebé sujeita ba rejistu, ida-ne’e presiza mós Governu iha poder administrativu no reguladór.
“Nune’e, mai ita halo serbisu ne’e konforme ita-nia lei no konforme ita-nia konvensaun ne’ebé ita ratifika tiha ona iha 2003. Ho ida0ne’e lansamentu ne’e mantein no prezerva rejistu ho objetivu kontribui ba nasaun ne’e entermu dadus pesoál kona-ba direitu labarik sira-nian,” nia dehan.
Governante ne’e hateten, rejistu ne’e fasilita asesu ba labarik no família ba benefísiu seguransa, saúde, edukasaun hanesan protesaun ba labarik kontra adosaun ilegál, traballu infantil, detensaun no prizaun ilegál no asaun ilegál sira seluk.
Nune’e fatin rejistu ho móvel iha munisípiu lima hanesan Ermera, Liquiça, Baucau, Viqueque no Dili, ba rejistu ba labarik husi idade 0 to’o lima (5) bele rejistu ho kritériu ho sertidaun nacsimentu, sertidaun batízmu, karteira identidade ou títilu eleitór ho sira seluk.
Governante ne’e hatete, rejistu ne’e pretende sei hala’o ba nia alvu ka meta ba labarik Timor-Leste hamutuk 15.000.
Entretantu, iha serimónia lansamentu ne’e partisipa mós husi Vise Ministra MSSI, Céu Brites, reprezentante UNICEF iha Timor-Leste, Patrizia DiGiovanni ho autoridade sira seluk tan.
Jornalista : Nelson de Sousa
Editór : Cancio Ximenes
