COVALIMA, 30 Setembru 2024 (TATOLI) – Diresaun Rekursu Umanu husi Ministériu Administrasaun Estatál (MAE) disemina informasaun kona-ba prosesu avaliasaun ba kargu xefia no funsionáriu sira iha munisípiu Covalima.
Xefe Departamentu Jestaun Pesoál (MAE), Jaime Taeque, dehan MAE presiza partilla informasaun, nune’e kargu xefe sira bele hatene prosesu avaliasaun ba dezempeñu funsionáriu sira-nia no sé mak presiza atu halo avaliasaun.
“Tuir Dekretu-lei númeru 14/2018, xefe departamentu mós halo avaliasaun dezempeñu ba funsionáriu, maibé hafoin halo alterasaun ba Dekretu-lei númeru 3/2016, kinta alterasaun dekretu-lei númeru 84/2023, fó kompeténsia ba administradór atu halo avaliasaun ba xefe seksaun no ba funsionáriu-sira. Diretór servisu munisipál avalia serbisu xefe departamentu no PAM mak avalia serbisu diretór munisipál no sekretáriu na’in-tolu”, Jaime Taeque informa ohin.
MAE divulga informasaun relasiona ho mudansa estrutura, tanba funsionáriu balun molok ne’e asume kargu xefe departamentu no balun funsionáriu asumi kargu diretór munisipál ne’ebé bele hatuur sira-nia knaar sai hanesan avaliadór, aprovadór no omologadór.
Tuir orientasaun MAE, atividade diseminasaun ne’e hala’o iha munisípiu 12, inklui Rejiaun Administrativa Espesiál Oecusse Ambeno (RAEOA), ne’ebé ohin hala’o ona iha Covalima hafoin kontinua bá Ermera to’o remata.
Prezidente Autoridade Munisipál Covalima, Miguel Armada Cardoso, dehan MAE disemina informasaun ba kona-ba prosesu avaliasaun ba serbisu funsionáriu ne’e importante oinsá mak kargu xefia avalia nia funsionáriu sira ho di’ak.
“Disemina informasaun hodi fó hanoin ba ita tuir lei no regra ne’ebé vigora ne’e importante ba ita. Ita-boot sira ezekuta ona serbisu balun, maibé serbisu seluk la’o seidauk di’ak, tanba ne’e presiza atu rona didi’ak informasaun, nune’e bele kumpre tuir”, nia fó hanoin.
Autoridade Covalima ne’e dehan avaliasaun ne’e haree funsionáriu tama serbisu tarde no fila sedu, presiza halo planu diáriu atu ezekuta hodi entende idaidak nia-serbisu, ba administradór sira presiza atu avalia xefe seksaun sira-nia serbisu la’o di’ak ka la’e, tanba haree ba dezempeñu tuun.
Miguel Cardoso alerta ba funsionáriu ne’ebé la tama serbisu, maibé iha relatóriu laiha falta, nia parte seidauk haree didi’ak, tanba diretór munisipál sira mak halo jestaun ba nia funsionáriu rasik hodi kontrola sira-nia serbisu no pontualidade.
Jornalista: Celestina Teles
Editora: Maria Auxiliadora
