DILI, 30 setembru 2024 (TATOLI) – Ministériu Transporte no Komunikasaun (MTK) halo akordu ho Ajénsia Nasionál Buka no Salva ka Badan Nasional Pencarian dan Pertolongan (BASARNAS) Indonézia hodi hametin servisu buka no salva bainhira akontese asidente.
MTK Miguel Marques Manetelu hato’o ida-ne’e iha ámbitu asina nota entendimentu (MoU) ne’ebé hala’o husi MTK no BASARNAS iha loron 19 setembru 2024 iha Bali, Indonézia.
“Ha’u mós asina MoU ho BASARNAS, ida-ne’e relasiona ho asidente sira ne’ebé akontese iha tasi no anin, oinsá mak sira bele halo intervensaun hodi ajuda, tanba ita mós rekoñese katak ita-nia ekipamentu la to’o maske ita iha Polísia Marítima”, Ministru Miguel informa ba TATOLI iha Aeroportu Nicolau Lobato Comoro, segunda ne’e.
Nia afirma, MoU ne’e ho intensaun atu hametin relasaun kooperativa iha ámbitu buka no salvamentu, liuliu iha setór aviasaun no marítima, inklui troka informasaun, komunikasaun no koordenasaun.
Aleinde ne’e, atu hasa’e kapasidade rekursu umanu nian liuhosi formasaun no ezersísiu konjuntu sira, uza ekipamentu no infraestrutura sira no mós fahe téknika sira iha área peskiza no salvamentu nian liuhosi semináriu, workshop no konferénsia sira.
“Hanesan akontese iha fulan hirak liu ba, ita-nia Polisia Marítima mós salva peskadór balun atu iha futuru ita bele hametin liután ita-nia kooperasaun karik akontese asidente ka dezastre ruma iha tasi laran ka iha anin laran ita serku husi provínsia sira Indonézia nian”, nia esplika. .
Antes ne’e, Xefe BASARNAS, Marsdya TNI Kusworo, iha ninia pájina ofisiál, hateten kooperasaun ne’e importante tebes tanba iha prátika implementasaun operasaun BASARNAS, liuliu iha área fronteira sira hanesan Indonézia no Timor Leste, presiza komunikasaun no koordenasaun intensivu entre nasaun sira.
“Orientasaun ne’e atu fó asisténsia imediata ba ita-nia maun-alin sira ne’ebé esperiénsia emerjénsia iha área fronteira entre nasaun hirak ne’e”, nia dehan.
kolaborasaun entre MTK ho BASARNAS ne’e sei la’o durante tinan lima tuir akordu ne’ebé halo ho Xefe BASARNAS Indonézia, Marsdya TNI Kusworo no Ministru Transporte no Komunikasaun, Miguel Marques Gonçalves Manetelu.
Jornalista : Felicidade Ximenes
Editór : Zezito Silva
