DILI, 30 setembru 2024 (TATOLI) – Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál, Domingos Raul Falur Rate Laek, hateten nasaun membru 40 ne’ebé hola parte iha kooperasaun Indo-Pasífiku koopromete kontinua hametin kooperasaun militár ho Timor-Leste.
“Ha’u-nia viazen durante ne’e ba rai li’ur, hodi ba tuir konferénsia ka reuniaun altu kona-ba Indo-Pasífiku iha Hawai ne’ebé hola parte nasaun 40. Iha enkontru ne’e ha’u la partilla buat ida, maibé ha’u agradese de’it ba apoiu sira ne’ebé ita-nia parseiru dezenvolvimentu sira apoia ita hodi ita iha kapsidade bele partisipa iha atividade sira iha mundu no sira iha komitmentu nafatin atu apoia hodi servisu hamutuk ho ita ba dezenvolvumentu militár”, Falur Rate Laek hateten ba jornalista sira iha Aeroportu internasionál Nicolau Lobato,Comoro, segunda, ohin.
Nia dehan, iha konferénsia nivél altu nia hodi koalia kona-ba kestaun intelijénsia artifisiál no koalia mós kona-ba kestaun mundiál ne’ebé mundu hasoru.
“Nasaun membru Indo-Pasífiku nasaun hotu husu tenke servisu hamutuk ka koopera malu, desizaun inkluzivu no koalia mós kona-ba seguransa no defeza liuliu kestaun mundiál nian”, nia adianta.
Falur relata katak hafoin fila husi konferénsia altu nivél Indo-Pasífiku iha Hawai, halo mós vizita ba Filipina hodi hasoru malu ho nia omólogu Xefe Estadu Maiór Forsa Armada Filipina.
“Iha ha’u-nia vizita, ha’u hasoru malu ho ha’u nia omólogo Xefe Estadu Maiór Forsa Armada Filipina iha enkontru bilaterál ne’e ha’u koalia hodi hametin liután kooperasaun militár no buat ne’ebé halo ha’u impresiona iha vizita ne’e mak ha’u-nia omóloga ne’e oferese noite kulturál ba ha’u, ida-ne’e halo ha’u impresiona”, nia konklui.
Jornalista: Natalino Costa
Editór : Zezito Silva
