VIQUEQUE, 30 setembru 2024 (TATOLI)-Konsellu Impresa Timor-Leste (CI, portugés), segunda ne’e, halo sorumutu ho Rádiu Povu Viqueque (RPV) no jornalista destakadu sira iha munisípiu Viqueque.
Iha sorumutu ne’e Konsellleira CI, Isabel M. F. de Jesus, hateten, objetivu sorumutu ida-ne’e CI hakarak rona dezafiu saida maka jornalista iha munisípiu Viqueque hasoru hala’o atividade kobertura.
“Sorumutu ida-ne’e ami hakarak rona direta husi jornalista sira, depois ami rona tiha dezafiu sira-ne’e sei lori ba Konsellu Imprensa hodi konsilleiru sira diskute hamutuk ba dezafiu sira-ne’ebé jornalista sira enfrenta,” nia hateten ba jornalista Agência TATOLI, iha edifísiu Rádiu Povu Viqueque (RPV), Viqueque, ohin.
Tanba ne’e konselleira ne’e dehan, sorumutu ne’e importante hodi CI prova direta kona-ba dezafiu sira husi ba jornalista destakadu Agência TATOLI, RPV, maibé sorumutu referida CI konvida hotu jornalista destakadu Radiu Televizaun Timor-Leste, Empreza Públika (RTTL, EP) marka prezensa.
“Husi dezafiu sira-ne’e ami anota hodi diskute iha CI, atu haree fali ba futuru oin mai CI bele tau ba prioridade,” nia realsa.
Nune’e iha sorumutu ne’e nia apresia, serbisu jornalista sira-ne’ebé hala’o serbisu profisaun jornalizmu iha minisípiu Viqueque no mantein kumpri publikasaun bazeia ba kódigu jornalizmu nian.
“Ami husu jornalista nafatin kumpri kodigu jornalizmu no CI rasik prodús ona matadalan Igualidade inkluzaun, atu fasilita jornalista sira-nia kobertura iha terrenu,” nia hato’o.
Reprezenta jornalista munisípiu Viqueque, atuál jestór Radiu RPV, Florindo de Jesus, agradese CI ne’ebé mai rona direta dezafiu jornalista sira iha munisípiu Viqueque ne’ebé durante ne’e hasoru.
“Durante ne’e jornalista sira hala’o serbisu kobertura ba postu no suku sira iha munisípiu Viqueque tomak hodi divulga informasaun ba públiku sira. Dezafiu ne’ebé ha’u nota liga ba jornalista sira-nian kobertura ida maka transporte ba jornalista sira uza ba kobertura tantu jornalista RPV transporte iha RPV motorizada rua de’it no Agência TATOLI ne’ebé difikulta ba jornalista sira hakarak ba fatin ruma halo kobertura. Alende ne’e ami mós husu CI realiza formasaun karik envolve mós jornalista sira munisípiu,” nia rekomenda.
Jestór RPV, Florindo de Jesus konta, jornalista dala barak simu konvite husi suku no aldeia sira bainhira la iha transporte atu fasilita jornalista sira ba halo kobertura, entaun sira labele ba tanba postu sira ne’ebé dook husi munisípiu hanesan Uatucarbau, Lacluta Uatulari no Ossu.
“Bainhira ema fasilita jornalista sira ho karreta, entaun sira ba. Transporte sai hanesan difikuldade ba jornalista destaku no jornalista RPV rasik. Ha’u espera ida-ne’e parte relevante sira bele tau ba konsiderasaun,” nia prefere.
Entretantu, sorumutu entre CI ho jornalista sira iha Viqueque, jornalista RPV kompostu hosi na’in-haat, inklui jornalista destakadu Agência Tatoli,I.P.
Jornalista : Vitorino Lopes da Costa
Editór : Rafael Ximenes de A. Belo
