Ainaro tama ona faze prepara kondisaun implementa lei poder lokál
DILI, 01 outubru 2024 (TATOLI)–Prezidente Autoridade Munisipiu Ainaro, Manuela Georgina Carmo Bucar Corte-Real, hateten prezidente autoridade munisípiu sira hetan nomeasaun husi Primeiru-Ministru atu halo implementasaun ba poder lokál, nune’e agora munisípiu Ainaro tama ona ba faze prepara kondisaun no rekursu umanu atu implementa lei poder lokál.
Kondisaun sira mós prevista iha artigu 19 lei 11/2009 kona-ba divizaun administrativa territóriu katak kriasaun, modifikasaun munisípiu depende lei no bele konta tuir: Vontade maioria poulasaun liuhusi konsulta populár; prezervasaun homojenidade etnolinguistika no identidade kulturál lokál; ekilibriu potensiál no rekursu ba dezenvolvimentu; fatór jeografia, demografiku, ekonómiku, sosiál, kulturál no administrativu; inteerese ba kauza orden nasionál no rejionál ka lokál no ezisténsia sentru administrativu ne’ebé permite instalasaun orgaun munisipál.
“Iha tinan oin sei iha avaliasaun ba kondisaun mínimu ba munisípiu sira-ne’ebé preparadu ona ba implementa poder lokál. La’ós munisípiu hotu-hotu tenke implementa poder lokál dala ida, maibé konforme de’it kondisaun mínimu ne’ebé mak sei hetan avaliasaun husi nasionál katak preparadu atu hetan poder lokál,” Prezidente Autoridade Munisípiu Ainaro ne’e hateten ba Agência Tatoli, tersa ne’e.
Prezidente munisipál ho nia estrutura ba halo preparasaun ba prienxe kondisaun mínimu hodi bele implementa poder lokál.
“Hanesan ne’e, kondisaun dahuluk preparasaun rekursu umanu kona-ba lala’ok administrasaun katak ema kompreende nia tarefa ka lae. Ida seluk mak infraestrutura bázika ne’ebé bele fó moris ba munispiu sira hanesan kada munisípiu iha nia reseita rasik atu sustenta sira-nia atividade, la’ós buat hou-hotu mai husi nasionál,” nia hateten.
Prezidente munisipál ne’e dehan rekursu umanu tuir nesesidade kada munisípiu nian ho kualidade atu hadi’a ba iha atendimentu públiku ka ba komunidade.
“Ita iha rekursu umanu hotuhotu iha fatin, halo rekrutamentu. Ita tenki halo rekrutamentu ba postu sira-ne’ebé presiza, atu mellora atendimentu servisu públiku ba ita-nia komunidade, ida-ne’e iha prosesu hela. Infraestrutura ne’e, ita atu haree ba iha parte saúde, edukasaun no agrikultura nian no setór hotu-hotu,” nia dehan.
Nia hateten, iha Ainaro ne’e agora daudaun iha formasaun ba rekursu umanu ba iha setór oioin ne’ebé fornese husi kada ministériu husi nasionál iha área tékniku nian oinsá mak kapasita funsionáriu sira atu eleva sira-nia koñesimentu no hakle’an sira-nia serbisu.
Jornalista : Jesuína Xavier
Editór : Cancio Ximenes
