DILI, 01 outubru 2024 (TATOLI) – Família Pasiente lamenta ho atendimentu profisionál saúde iha Hospitál Nasionál Guido Valadares (HNGV) tanba la tau atensaun másima ba kondisaun bebé no husik de’it ba estajiariu sira mak atende, hodi lori afeta bebé hakotu iis iha sala ICU HNGV.
“Iha momentu ne’ebá ami lamenta tebes mak profisionál saúde sira la tau atensaun másima ba kondisaun bebé nian no husik de’it ba estajiariu sira mak atende to’o hakotu iis iha sala ICU bebé nian. Maske família buka alternativu seluk atu fó netik buat ruma ba bebé konsumu, maibé pesoál sira la aseita hodi husik de’it nune’e durante loron rua nia laran to’o bebé hakotu iis, maske bebé bele tanis no sintina normál”, Família Pasiente Rosantino Gomes informa liuhosi konferénsia imprensa iha Ailok laran, ohin.
Aman husi bebé lamenta ho atendimentu iha HNGV tanba nia oan fila hikas ba aman Maromak iha loron 22 fulan-Setembru tinan 2024, iha HNGV.
“Iha loron 19 setembru 2024, inan husi matebian sente kidan moras hodi hakbesik aan ba sentru saúde neʼebé mak besik hanesan sentru saúde Aimerleu Postu Administrativu Hato-Udo, Munisípiu Ainaro iha oras 03:00 lorokraik. Hafoin to’o iha sentru saúde hetan kedas atendementu husi médiku destakadu sentru nian, maibé sentru ne’e menus ekipamentu saúde ho nune’e liu oras ida ho balun profisionál saúde sujere atu transfere pasiente ne’e mai Ainaro ho razaun tanba pasiente ne’e partu oan ba dahuluk nian ho operasaun sejariana”, nia afirma.
Nia konta tan, hafoin to’o iha sentru saúde Ainaro tuku 06:00 lokraik médiku sira sujere atu transfere ba HNGV ho razaun katak ekipamentu mak la sufisiente. Ho nune’e iha sentru saúde Ainaro demora oras rua nia laran to’o bee manas mós fakar. Bainhira to’o iha HNGV Dili iha oras tuku 11:45 kalan no hakat ba sala maternidade hodi hetan kedan atendimentu husi profisionál saúde sira.
“Ami família mós iha esperansa boot no depozita ami-nia konfiansa tomak ba profisionál saúde sira-nia liman, maibé rezultadu hatudu oin seluk husi profisionál sira, tanba demora tebes to’o tuku 02:00 madrugada ho razaun katak hein de’it nia oras atu bebé bele moris normál. Maibé buat ida ne’ebé ami nota hanesan kestaun mak ne’e, husi postu saúde Aimerleu nian sujere atu halo operasaun sejariana, maibé iha HNGV latoma konsiderasaun ba referénsia ne’e”, nia relata.
Nia afirma, bee manas fakar ona iha Sentru Saúde Ainaro tuku 07:00 kalan molok aranka mai Dili no liu oras balun mak pasiente foin to’o iha Dili, maibé profisionál saúde HNGV koko demora tan to’o oras tuku 02:00 madrugada se ita sura husi oras bee manas fakar entaun 07:00 kalan hamutuk oras hitu nia laran tiha ona. Agora bebé moris ho kondisaun normál, maibé profisionál saúde sira lori bebé ba luut iha ICU bebé nian durante loron rua la konsumu buat ida to’o bebé hakotu iis.
“Ami mós lamenta ho atendimentu pesoál saúde ba bebé ninian, bainhira pesoál saúde sira suku oan fatin durante oras rua nia laran, maibé la susesu no iha kedan ami nia oin sira bolu fali espesialista ida mai no espesialista ne’e mos dehan sira suku sala, no espesialista sujere atu lori pasiente ne’e ba iha sala operasaun hodi nune’e bele hadia fali suku ne’ebé mak pesoál sira halo sala ne’e no iha sala operasaun espesialista sira halo atendementu hodi suku oan fatin durante oras tolu nia laran ho razaun katak oan fatin nakles hotu, pergunta mak ne’e oan fatin nakles ne’e semak halo nakles”, nia hatutan.
Rekomenda ba jestaun ospitalár katak atu ospitál no sentru saúde sira atu toma konsiderasaun hodi labele fó bebeik pasiente neʼebé ho kondisaun grave ba estajiariu sira atende. Tau mós fasilidade saúde hodi apoiu médiku sira-nia serbisu iha sentru saúde no postu sira iha baze atu nune’e labele peruzidika ba ema nia vida.
“Rekomenda ba Ministra Saúde atu aumenta osan ba kapitál menor atu bele kompra ekipamentu sira hodi responde ba espetativa komunidade sira-nian iha futuru. Rekomenda mós ba Ministra Saúde atu hasae kualidade atendementu pesoál saúde sira nian iha área rurais inklui kompleta mós ho fasilidade saúde atu nune’e pasiente sira bele hetan atendementu besik liu”, nia afirma.
Husu mos ba Ministériu Saúde atu kontrolu másimu ba pesoál saúde sira iha nasionál to’o ba baze, atu bele dezempeña funsaun profisionál ho di’ak.
Hatan ba preokupasaun ne’e, Ministra Saúde Elia dos Reis Amaral husu ba família matebian atu aprezenta keixa ba diresaun étika deontolojia iha HNGV.
“Ita hatene katak ita iha Diresaun étika dentolójika, se la satifaz ho atendimentu, bele hakerek iha papél hodi tau iha kaixa ne’ebé prepara ona”, Elia dos Reis Amaral, informa ba Jornalista sira iha Palásiu Governu, ohin.
Jornalista : Felicidade Ximenes
Editór : Zezito Silva
