VIQUEQUE, 01 outubru 2024 (TATOLI)- Institutu Nasionál Seguransa Sosiál (INSS) no Banku Nasionál Komérsiu Timor Leste (BNCTL, sigla portugés), tersa, hahú halo pagamentu subsídiu idozu faze datoluk ba benifísiariu sira iha Postu Uatucarbau, minisípiu Viqueque.
Tuir Xefe suku Irabin de Baixo, José Baptista do Carmo, hateten daudaun ne’e ekipa BNCTL halo hela pagamentu ba idozu sira husi suku Irabin de Baixo na’in-275.
“Maibé pagamentu ida-ne’e ba idozu sira-ne’ebé moras iha uma, banku sei la ba halo pagamentu, hafoin pagamentu ida ne’e hotu liu tiha semana ida maka ekipa banku foin ba tuir sira-ne’ebé moras iha uma hodi halo pagamentu”, nia hateten ba Agência Tatoli, iha suku Irabin de Baixo, ohin.
Benifisiáriu idozu husi suku Irabin de Baixo na’in-30 maka labele simu sira-nia direitu tanba moras ne’ebé labele mai sede suku, nune’e semana oin maka foin banku ba halo pagamentu iha benifisiáriu sira-nia rezidénsia.
“Nu’udar autoridade lokál ami haree pagamentu faze datoluk ba ita-nia benifisiáriu sira-ne’e la’o di’ak. Maske idozu sira-ne’ebé moras no la’o labele família sira labele simu, maibe ida-ne’e fallansu ki’ik ba futuru bele hadi’a”, nia akresenta.
Tuir dadús benifisiariu iha Viqueque hamutuk 8.905, kompostu husi Postu Uatucarbau husi suku neen totál na’in-985, postu Lacluta suku haat ho totál idozu na’in-1.010, postu Uatulari suku neen totál benifisiariu hamutuk 2.530, postu Ossu suku sanulu ho totál benifisiáriu hamutuk 2.092 no postu Viqueque Vila totál idozu hamutuk 2.288.
Tuir oráriu husi BNCTL pagamentu faze datoluk ba idozu sira hahú loron 30 Setembru no sei ramata pagamentu ba idozu sira iha suku 36 iha loron 4 Outubru 2024.
Jornalista : Vitorino Lopes da Costa
Editór : Florencio Miranda Ximenes
