Top

PN hato’o votu pezár falesimentu antigu Deputadu Augusto da Conceição Amaral

Matebian antigu Deputadu Augusto da Conceição Amaral (LALOIR). Imajen TATOLI/Espesiál.

DILI, 01 outubru 2024 (TATOLI)—Parlamentu Nasionál (PN) liuhusi reuniaun plenária, tersa ne’e, aprova votu númeru 13/VI (2a)-pezár ba falesimentu ba antigu Deputadu Augusto da Conceição Amaral (LALOIR) ne’ebé hakotu iis ho idade 84 iha 26 setembru 2024 iha nia rezidénsia Lahane Orientál, Dili.

“Rezultadu votasaun ba Votu pezár  afavór 61, kontra no abstensaun 0. Ne’ebé, votu pezár ne’e pasa,” Prezidente Parlamentu Nasionál, Maria Fernanda Lay, fó sai iha sala plenária PN, tersa ne’e.

Entretantu, tuir textu votu pezár ne’ebé sekretária meza PN lee sai iha sala plenária katak  matebian moris iha 09 agostu 1940, oan husi Mário António Mendonça no Maria da Conceição Mendonça, no iha maun-alin hamutuk na’in-lima (5), kaben ho Helena da Silva no iha oan na’in-hitu (7).

Tama ensinu báziku hahú iha 1948 iha eskola misaun Don Bosco iha Lahane durante tinan neen no termina iha kuarta klase iha 1954.

Iha 1969-1972, serbisu nu’udar sekretáriu iha postu administrativu Aileu no iha 1974 bainhira ASDT transforma ba FRETILIN nu’udar ativista iha Organizasaun Populár Juventude Timor (OPMT).

Iha 13 agostu 1975, ho konfiansa husi Abel Larisinha no Moisés no akompaña husi irmaun Joanico nu’udar kondutór husi Dili atu transporta ba Aileu ho líder barak husi Komite Sentrál FRETILIN (saudozu Nicolau Lobato, Hamis Vin Umar Bassarewan-Hatta, Alarico Fernandes ho sira seluk).

Iha 1976 até 18 outubru 1975, nia asume kargu asistente zona organizasaun partidu FRETILIN, responde diretamente perante saudozu Afonso Redentor membru CCF.

Saudozu hetan kapturasaun iha 13 outubru 1978 husi militár Indonézia no detidu iha Sang Tai Ho iha Colmera no liberta iha 31 dezembru 1979.

Iha 10 juñu 1980, saudozu Augosto ho nia maluk hanesan Pedro Carvalho, Fernanda Castro Martinho Cardoso no Mário Perreira hamutuk ho membru FALINTIL lidera husi Pedro Kmanek iha Suhurama prepara asaltu militár kontra forsa Indonézia iha Marabia iha armazen Paiol no iha Becusse.

Hafoin ne’e, Augusto rekua atu oho, ne’ebé hetan kapturasaun dala ida tan iha Dare no kastigu iha Kotiz-Faról, no muda ba KODIM (Komando Distrik Militer) no liberta iha 20 setembru 1984.

Partisipa mós iha manifestasaun pasífika iha 12 outubru 1989 durante vizita Papa João Paulo II, no manifestasaun 12 novembru 1991 iha Santa Krus ne’ebé lideradu husi Gregório Saldanha.

Iha 10 jullu 1992, iha frente klandestina nomeadu nu’udar respnsável iha Nurep ne’ebé dirijente másimu husi Angelo Godinho iha Dom Aleixo no kaixa Inur Fuik.

Asume kargu sekretáriu Nurep iha zona Nain Feto entre 1998-1999 ne’ebé xefia husi Félix Gusmão.

Hafoin indepedénsia asume kargu vise koordenadór komisaun polítika munisípiu Aileu entre 2000-2001.

Iha 2002, eleitu membru asembleia konstituente husi partidu FRETILIN nu’udar Deputadu lejislatura dahuluk.

Iha 2000, funda eskola sekundária postu administrativu Laulara, serbisu hanesan mós profesór dalen portugés iha eskola refere.

Augusto da Conceição Amaral “Laloir” hetan kondekorasaun ho Ordem Nicolau Lobato no hetan rekoñesimentu pensaun espesiál reforma eskalaun 2 koresponde a 15 ba tinan 19 partisipasaun iha tempu inteiru.

Ninia serbisu ikus antes hakotu iis nomea hanesan prezidente komisaun ba kria monumentu Marabia.

Parlamentu Nasionál (PN) reune iha sesaun plenária expresa ninia profundu pezár ba falesimentu Augusto da Conceição Amaral “Laloir”, enderesa sentida kondolénsia ba ninia família, ba partidu FRETILIN no ninia amigu enlutada.

Votu pezár ne’e aprezenta husi Deputadu FRETILIN David Dias Ximenes ‘’Mandati’’.

Jornalista : Nelson de Sousa

Editór        : Cancio Ximenes

Publisidade

Leave a Reply

Latest Post

error: Content is protected !!