DILI, 01 outubru 2024 (TATOLI)—Parlamentu Nasionál (PN), tersa ne’e, liuhusi reuniaun plenária aprova proposta rezolusaun Parlamentu Nasionál númeru 8/VI(1a)/2024 ratifika akordu entre Governu Repúblika Demokrátika Timor-Leste (TL) ho Governu Repúblika Singapura kona-ba izensaun vistu ba titulár passaporte dipomátiku, ofisiál ou serbisu ordináriu.
“Rezultadu votasaun afavór 61, kontra no abstensaun zero, hodi nune’e akordu ne’e ratifikadu,” Prezidente Parlamentu Nasionál, Maria Fernanda Lay, fó sai iha sala plenária PN.
Tuir testu ba proposta rezolusaun ne’e ba ratifika akordu entre Governu Repúblika Demokrátika Timor-Leste (TL) ho Governu Repúblika Singapura kona-ba izensaun vistu ba titulár pasaporte dipomátiku, ofisiál ou serbisu ordináriu.
Konsidera relasaun ezistente entre Repúblika Demokrátika Timor-Leste ho Repúblika Singapura, ho nune’e iha konsiderasaun dezeju kontinua aprofunda relasaun amizade no kooperasaun no promove forma efetiva ba dezlokasaun ofisiál no turizmu entre nasaun no iha ámbitu Asosiasaun Nasaun Sudeste Asiátiku (ASEAN).
Nune’e, atu fasilita dezlokasaun sidadaun Timor-Leste no Singapura iha respetivu territóriu, ho motivu ofisiál ou turizmu, liuhusi konsesaun isensaun vistu ba entrada no estadia até loron 30.
Nune’e mós, konta ho roteiru ba adezaun hanesan membru pleanu TL ba ASEAN, relativa ho rekoñesimentu pasaporte diplomátiku, ofisiál ou serbisu no dispozisaun sira husi akordu ASEAN kona-ba izensaun vistu, hanesan determinasaun TL iha implementasaun no kumpre instrumentu sira hotu ASEAN nian.
Ho konsiderasaun tuir termu konstitusaun repúblika kompete ba PN ratifika akordu internasionál ne’e, nune’e Governu aprezenta ba PN tuir abrigu iha aleina a) iha númeru 2) iha artigu 115 konstituisaun ho pedidu prioridade urjénsia hodi aprezenta proposta rezolusaun.
Ratifika akordu entre Governu TL ho Governu Singapura kona-ba izensaun vistu ba titulár ho pasaporte diplomátiku, ofisiál ou serbisu ordináriu, ne’ebé asina iha Singapura iha loron 27 fulan Juñu 2024.
Jornalista : Nelson de Sousa
Editór : Cancio Ximenes
