VIQUEQUE, 02 outubru 2024 (TATOLI)-Koordenadór Ensinu Báziku Filiál (EBF) númeru 92 Bahatata, iha Postu Uatucarbau, munisípiu Viqueque, Lino Pinto, informa, durante ne’e enfrenta problema liuliu menús profesór no sala apredizajen.
” Dezafiu ne’ebé ami hasoru mak profesór ka manorin menús, tanba daudaun ne’e ami nia-profesór na’in-4 maka kobre ba sala neen. Dezafiu seluk mak sala de aula la sufisente tanba agora ami nia saladeaula tolu, maibé sala ida ami halo tiha ba eskritóriu ne’ebé sala rua maka uza ba prosesu apredizajen”, nia hateten ba Agência Tatoli, iha postu Uatucarbau, ohin.
Profesór ne’ebé hanorin iha EBF 92 Bahatata maioria idade avansadu, ne’ebé idade tama ona reforma ne’ebé presiza tebes kolokasaun profesór hodi hanorin estudante sira.
“Nune’e, ami husu atu halo lalais kolokasaun ba profesór sira, ami reforma karik sira bele kontinua lori eskola ida-ne’e ba oin. Durante ne’e mós hato’o beibeik ona ba munisípiu, maibé sira dehan hein rekrutamentu profesór foun maka aloka mai iha ne’e”, nia afirma.
Tuir nia, daudaun ne’e presiza profesór na’in-tolu hodi reforsa profesór sira iha EBF 92 Bahatata tanba profesór la sufisemte hodi hanorin estudante sira ho saladeaula neen.
Enkuantu, EBF 92 Bahatata edifísiu saladeaula tolu ne’ebé uza eskritóriu ida, sala rua uza ba prosesu apredizajen no komunidade Bahatata apoia kria saladeaula temporariu sala haat didin ho au, maibé daudaun ne’e kondisaun aat, nune’e tempu udan no anin boot labele uza hodi hanorin estudante sira.
Tuir dadús estudante EBF 92 Bahatata hamutuk 82 kompostu husi klase 1 to’o klase 3, ho profesór na’in-haat.
Jornalista : Vitorino Lopes da Costa
Editór : Florencio Miranda Ximenes
