DILI, 02 outubru 2024 (TATOLI)—Estudante finalista hamutuk 58.271 sei partisipa ezame nasionál ne’ebé sei realiza iha loron 14 outubru tinan ne’e.
“Ami simu dadus ezame primeiru períodu hamutuk 58.271, kompostu husi ensinu báziku 29.252, ensinu sekundáriu jerál 24.894, no ensinu sekundáriu tékniku vokasionál 4.125. To’o agora númeru estudante finalista ne’ebé tuir ezame nasionál ne’e seidauk iha mudansa signifikativu, ida-ne’e mantein no sei tuir ezame nasionál hahú loron 14 outubru,” Koordenadór Gabinete Unidade Kurríkulu Nasionál iha Ministériu Edukasaun (ME), João Maupelu, informa iha ninia knaar fatin, Vila-Verde, kuarta ne’e.
Notísia relevante : ME hahú halo imprensaun ba pontu ezame nasionál
Matéria ezame nasionál ba ensinu báziku mak hanesan matemátika, inglés, portugés, istória no jeografia no Siénsia naturál inklui tetum. Ba ensinu sekundáriu jerál mak matemátika, ekonomia kuantitativu, inglés, portugés, kímika, istória, biolojia, sosiolojia, fízika, jeografia no tetum. Ba ensinu sekundáriu tékniku vokasionál mak hanesan matemátika, ekonomia kuantitativu, portugés, fízika kímika, fíziku de’it mós iha, ekonomia, kímika, sosiolojia, jeografia e sosiolojia, depois istória no biolojia.
“Ekipa prepara ona fasilidade, tanba kuandu atu realiza ezame nasionál ne’e tenke iha estudante, profesór, saladeaula, karteira eskolár, no ekipamentu ezame, ne’e konserteza ona. Tanba ne’e tinan-tinan sempre akontese ezame nasionál,” nia akresenta.
Iha sorin seluk, Diretór Servisu Edukasaun Munisípiu Ainaro, Patrício da Costa Magno, hateten, parte Edukasaun Ainaro nia preparasaun ba ezame nasionál atinje ona 100%.
“Agora hein de’it implementa. Ita hasai ona karta ba seguransa hodi fó seguransa ba ita-nia realizasaun ezame nasionál iha Ainaro. Tanba númeru estudante ne’ebé atu tuir ezame mós sai tiha ona, nune’e ita preparadu ein termu ema no fasilidade,” nia tenik.
Enkuantu, fasilidade ezame ba Ainaro laiha problema tanba horiseik ME haruka tan ona karteira eskolár (meza no kadeira) hamutuk 100 mai Eskola Ensinu Sekundáriu Lasama.
Estudante ne’ebé atu tuir ezame nasionál iha eskola Ainaro, ensinu báziku iha estudante 1.549, ensinu sekundáriu jerál iha estudante 1.166 no ensinu tékniku vokasionál iha estudante 181.
Jornalista : Osória Marques
Editora : Julia Chatarina
