DILI, 02 outubru 2024 (TATOLI) – Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál, Domingos Raul ‘Falur Rate Laek’, husu ba Ministru Defeza Kontra Almirante Donanciano Costa Gomes Pedro Klamar Fuik, atu kriminaliza empreza ne’ebé abandona projetu infraestrutura militár iha área Dama-Laran, Postu Adminstrativu Atabae, Munisípiu Bobonaro.
“Ha’u haree projetu ne’e paradu tiha ona. Ha’u-nia relatóriu ba ona Ministru Defeza, maizmenus sei iha posibilidade kriminaliza kompañia ne’e”, Falur dehan ba jornalista sira hafoin remata enkontru avaliasaun ekipa forsa tarrefa konjunta ‘Pombu Mutin’ ba seguransa vizita Sua Santidade Papa Francisco mai Timor-Leste ne’ebé halao iha Sentru Formasaun Polísia (CFP, sigla portugés) Comoro, kuarta, ohin.
Nia dehan, empreza ne’ebé mak kaer projetu infraestrutura militár ka kajerna militár iha Dama-Laran ne’e ema timoroan.
“Kompania ne’e timoroan, hau ba haree sira abandona, buat ne’e kle’ur ona no gasta osan barak tanba ne’e presiza kriminaliza”, nia hakotu.
Jornalista: Natalino Costa
Editór : Zezito Silva
