BAUCAU, 03 outubru 2024 (TATOLI) – Autoridade Administrasaun Munisipál Baucau propoin proposta Orsamentu Jerál Estadu (OJE) tinan-2025 hamutuk miloens $12.437.747.00.
Sekretáriu Munisipál Asuntu Administrasaun no Finansas, Juvinal Daniel Filipe Belo, esplika, husi totál orsamentu tinan-2025 pasa ona iha diskusaun Komisaun Revizasaun Orsamentál (KROP) ne’ebé fahe ba kategória haat hanesan saláriu no vensimentu, bens serbisu, transferénsia públiku no kapitál dezenvolvimentu.
“Ita labele atende hotu ligadu ho prekupasaun komunidade nian maibe ita hein husi Governu sentrál atu aloka liuhusi fundu infraestrutura,” Sekretáriu Munisipál Asuntu Administrasaun no Finansa informa ba Agência TATOLI iha Vila nova, kinta ne’e.
Husi rubrika haat referida fahe ba kategória saláriu no vensimentu hamutuk milloes $2.712.445, bens serbisu rihun $742.500, transferénsia públiku milloes $7.475.580 no kapitál dezenvolvimentu sei aloka ba projetu PDIM iha setór edukasun no saúde.
Autoridade Baucau sei aloka orsamentu ba kapitál dezenvolvimentu hamutuk projeitu 11 hanesan infraestrutura sala materna, rezidénsia pesóal saúde, sentru saúde inklui konstrusaun edifísiu eskola.
Alende ne’e, sei retensaun pursentu 10 ba projetu lima seluk tinan-2024 nian hanesan konstrusaun edifísiu administrasaun postu Matebian no Quelicai antiga, irigasaun watamutu, postu saúde Age no edifísiu Notariadu Baucau.
“Ita bele konsidera iha aumentu milloes $3 tanba PNDS hola parte iha Autoridade maibé tuir loloos ita menus pursentu 15 tanba bazeia ba ezekusaun orsamentu tinan-2024,” Juvinal Belo akresenta.
Autoridade Administrasaun Munisipál Baucau rasik antes ne’e prepara orsamentu adisionál hamutuk totál milloes $18 maibé aprovoka iha KROP hamutuk milloes $3.
Mezmu nune’e husi totál orsamentu ne’ebé aprezenta bele ona utiliza ba funsionamentu Administrasaun iha Autoridade Munisipál Baucau mezmu nesesidade komunidade nian iha baze sei responde ho projetu PNDS.
Jornalista : Natalino Belo
Editór : Rafael Ximenes de A. Belo
