DILI, 03 outubru 2024 (TATOLI)—Sekretáriu Jerál Partidu Demokrátiku (PD), António da Conceição “Kalohan”, informa, kinta ne’e, koligasaun CNRT ho PD liuhusi sekretáriu jerál partidu koligasaun sei realiza enkontru koordenasaun hodi konsolida koligasaun ba debate proposta-lei Orsamentu Jerál Estadu (OJE) 2025.
“Loos! Atu konsolida koligasaun no aumezmu tempu atu nafatin pasa mensajen estabilidade polítika governativa ninian. Ne’e signifika koezaun ne’ebé sei presiza nafatin husi koligasaun ne’e, ligadu ba aktu polítiku hotu. Aktu polítiku hotu ne’ebé mak Governu da-sia nian ida mós Orsamentu Jerál Estadu (OJE) 2025 ne’ebé mak iha ona Prezidente Parlamentu Nasionál, maibé seidauk anúnsiu iha plenária despaixu ba komisaun sira hotu. Tanba ne’e mak ha’u labele pronúnsia maibé objetivu prinsipál mak atu hametin estabilidade governativa,” Nia hateten ba Agência TATOLI liuhusi telefónika, kinta ne’e.
Tanba, nia hateten, iha nesesidade atu hametin konsolida fali koligasaun PD ho CNRT nian, mak orsida sei iha reuniaun entre Deputadu bankada Governu ho mós membru Governu.
“Ajenda loloos to’o iha ne’eba mak sei haree, maibé asuntu prinsipál ami hanoin mak nafatin manda mensajen polítika ba sosiedade tomak atu nafatin hametin estabilidade polítika governativa ninian hodi bele posibilita nafatin prosesu dezenvolvimentu ne’ebé Governu da-sia daudaun ne’e halo,” nia hateten.
Enkuantu, tuir konvite ne’ebé Agência TATOLI asesu, ohin, haktuir katak koligasaun demokrátika ba Governu Konstitusionál da-sia (IX) entre CNRT-PD hodi konvida Deputadu husi bankada Governu no membru IX Governu Konstituisionál atu hola parte iha reuniaun koordenasaun entre CNRT-PD hodi konsolida koligasaun ba debate OJE 2025.
Reuniaun ne’e sei halo iha loron 03 fulan-outuburu 2024 iha tuku 17h00 iha Sentru Konvensaun Dili (CCD, siglá portugés).
Jornalista : Nelson de Sousa
Editór : Cancio Ximenes
