DILI, 03 outubru 2024 (TATOLI)—Prezidente Asosiasaun Turizmu Relijiozu Timor-Leste, Pe. Ângelo Salsinha, hateten kualidade no ambiente lulik altar Tasi-Tolu nian, grupu Nasionál Tunggal Hati Seminar-Tungal Hati Maria (THS-THM) kontrola ka asegura hela fatin ne’ebá.
Saserdote ne’e mós hateten, aleinde grupu THS-THM iha mós Polísia Nasionál Timor-Leste no FALINTIL-Forsa Forsa Defeza Timor-Leste ne’ebé sira serbisu hamutuk hodi kuidadu fatin santu no istóriku ne’e.
“Seguransa ne’e loos duni, ita tau THS-THM hamutuk ho PNTL no F-FDTL sira mak hein hela. Ne’e hahú iha 11 setembru tuir amu Kardeál haruka,” Prezidente Asosiasaun Turizmu Relijiozu Timor-Leste ne’e hateten ba Agência Tatoli, kinta (03 outubru 2024) ne’e.
Nia esplika, grupu THS-THM nasionál organiza malu halo servisu seguransa voluntariamente ba altar Tasi-Tolu nian.
“Sira organiza malu halo oráriu hodi fahe serbisu ba seguransa altar Tasi-Tolu nian. Sira serbisu troka maluk,” nia hateten.
Husu kona-ba oinsá jestaun fatin ne’e ba turizmu relijiozu, saserdote hatán, Governu iha verbalmente ba igreja kona-ba asuntu maibé seidauk iha eskrita ruma hodi halo jestaun.
Maibé, nia hateten, Governu iha planu atu halo moru haleu altar no esplanada Tasi-Tolu.
Jornalista : Jesuína Xavier
Editór : Cancio Ximenes
