Investe kuidadu saúde sirúrjiku seguru no asesível ba ema hotu iha TL
DILI,03 outubru 2024 (TATOLI)—Ministériu Saúde hamutuk Hospitál Nasionál Guido Valadares (HNGV) halo primeira konferénsia sientífika sirúrjiku internasionál ho tema investe hodi hadi’a servisu kuidadu saúde sirúrjiku ne’ebé seguru no asesível ba ema hotu, iha Timor-Leste.
Objetivu husi primeira konferénsia sientífika sirúrjiku internasionál ne’e atu valoriza médiku sira-nia servisu tanba rai ida-ne’e presiza atu investe servisu kuidadu saúde sirurjiku ne’ebé seguru ba ema hotu.
“Depois ita ukun aan tinan-20 resin mEediku sirurjiaun ne’ebé mak eskola iha nasaun oinoin mai ona hala’o servisu iha ita-nia ospitál nasionál hodi fó asisténsia di’ak ba pasiente sira,” Vise-ministru Saúde ba Operasionalizasaun Ospitál, Flávio Brandão Mendes de Araújo dehan iha City8 Manleuana, ohin.
“Ita-nia médiku sira ne’e mak mai husi área oioin hanesan ortopedista, pediatria, plástiku, sirurjiaun jerál sira. Entaun, atu hateten katak ita la ki’ak ba rekursu umanu, maibé ita presiza de’it mak sira hetan kondisaun di’ak atu bele forma di’ak liutan servisu sira ne’e iha ita-nia rain,” governante ne’e énfaze.
Vise-ministru Saúde, Flávio Brandão afirma, konferénsia sientífika sirúrjiku internasionál ne’e dahuluk hala’o iha Timor-Leste hodi forma sosiedade ida atu nune’e ba oin sai organizadu liután.
“Ohin ita-nia médiku sirurjiaun sira halo sientífiku dahuluk iha ita-nia rain hodi forma sosiedade ida, atu nune’e ba oin mais organizadu hodi kontribui di’ak liután ba ita-nia rain, maibé ida-ne’e la’ós timoroan de’it, maibé hamutuk ho sira ne’ebé mak ligasaun hanesan médiku xineza sira ne’ebé mak fasilita ita liu husi dezenvolvimentu asisténsia nian,” nia informa.
Iha fatin hanesan, Diretora Asisténsia Klinikál HNGV), Ana Maria Magno, hateten, departamentu sirurjiaun halo primeira konferénsia ne’ebé halibur espesialista sira husi nasaun seluk atu aprezenta sira-nia atendimentu ne’ebé úniku ba pasiente sira ne’ebé mak interna iha HNGV.
“Husi konferénsia ida-ne’e oinsá bele fahe ideia ba malu kona-ba kazu sira ne’ebé mak iha, maibé sira bele fó tratamentu liuhusi diskusaun fahe ideia ba malu hodi fó asisténsia di’ak ba pasiente sira no oinsá sira bele dezenvolve departamentu sirurjiaun ba oin,” Ana Maria Magno dehan.
Nune’e mós, Xefe Departamentu Sirurjia HNGV, Arcanjo de Jesus Nunes, informa katak Konferénsia ida-ne’e la’ós de’it servisu sira ne’ebé mak durante halo, maibé ba dezafiu sira ne’ebé hasoru iha kampu, tanba ne’e husu médiku sira atu mai hamutuk hodi fahe koñesimentu durante loron rua hahú ohin no aban nune’e bele fó atendimentu ne’ebé di’ak ba pasiente sira.
Jornalista : Felicidade Ximenes
Editór: Rafael Ximenes de A. Belo
