DILI, 03 outubru 2024 (TATOLI)- Sekretáriu Estadu Kooperativa (SEKoop), Arsénio Pereira da Silva hateten atu hasa’e kualidade grupu kooperativa sira iha Timor-Leste liu husi formasaun hodi garante kualidade la’ós kuantidade.
“Uluk grupu kooperativa iha 220, maibé agora iha 230. Ha’u la target númeru grupu kooperativa atu aumenta, maibé buat ne’ebé ami target mak kualidade atu nune’e bele ajuda ekonomia nia membru sira,” SEKoop Arsénio Pereira hateten, hafoin tuir enkontru ho parseiru sira iha eskritóriu CVTL, ohin.
Governante ne’e afirma, grupu kooperativa adisionál konserteza sei kontinua eziste tanba envolvimentu no interrese ema barak nian hodi hola parte iha kooperativa, maibé SEKoop hala’o papél importante hodi garante sustentabilidade grupu kooperativa sira liuhusi formasaun.
SEKoop sei garante katak grupu kooperativa sira la’ós de’it sobrevive maibé mós buras iha ambiente ekonómiku ne’ebé kompetitivu liuhusi hasa’e kapasidade jestaun nian, abilidade téknika, inovasaun, rede sira, konxiénsia jurídika, no hametin komunidade sira, grupu kooperativa sira bele hala’o knaar xave iha dezenvolvimentu ekonómiku nasaun nian.
“Hanesan hatene katak, setór kooperativa sai hanesan fonte rendimentu ba ita-nia komunidade, liuliu agrikultór sira, tanba sira mak produtór prinsipál no ami fó formasaun konjunta no transforma sira ba kooperativa notariadu ofisiál,” nia dehan.
Tuir dadus husi SEKoop, oras ne’e daudaun iha grupu kooperativa 230 ho membru 37.000 ne’ebé 47% feto no iha valór kapitál millaun $19 iha territóriu TL
Iha fatin hanesan, Diretora Ajénsia Dezenvolvimentu no Ajuda Adventista (ADRA) iha Timor-Leste Virginia Pycroft, subliña katak durante ne’e ADRA apoia ona dezenvolvimentu grupu kooperativa sira, liuliu iha munisípiu Viqueuqe.
“Ami kolabora ona ho koperativa 12 iha Viqueque ne’ebé produs alia (jengibre) lilin, mina no maek (porang), entaun to’o agora buat hotu la’o ho di’ak no susesu,” Virginia Pycroft hateten.
ADRA Timor-Leste, liuhusi projetu Agrikultór ba Merkadu (FarMar), fó apoiu signifikativu ba grupu kooperativa sira iha rejiaun Viqueque. Projetu ne’e ho objetivu atu hasa’e agrikultór sira-nia asesu ba merkadu no hasa’e kualidade no kuantidade husi sira-nia produsaun.
ADRA fornese módulu formasaun kona-ba finansa no negósiu atu ajuda membru kooperativa sira komprende báziku kona-ba komersializasaun atividade agríkola. Aleinde ida-ne’e, sira mós fornese monitorizasaun kontínua ba fasilitadór merkadu Lokál sira hosi kooperativa ida-idak atu nune’e sira bele harii relasaun ho kompradór sira.
Jornalista : Felicidade Ximenes
Editór: Rafael Ximenes de A. Belo
