EUA mantein kooperasaun iha área formasaun militár
DILI, 04 outubru 2024 (TATOLI) – Ministru Defeza Kontra Almirante Donanciano Costa Gomes Pedro Klamar Fuik, hateten Estadu Unidus Amérika (EUA) reitera nia protidaun hodi mantein kooperasaun ho Governu Timor-Leste iha área formasaun militár.
“Portantu, señora emabaxadora, ohin, ami koalia kona-ba polítika nasionál kooperasaun iha domíniu defeza ne’ebé ita públika ona iha ita-nia polítika nasionál kooperasaun. Depois koalia ho sira no sira sei haree saida tán mak ita bele halo hamutuk ho sira. Maibé sira mantein ho apoiu ne’ebé mak sira fó mak ita haree ba formasaun. Hanesan ita bo’ot sira hatene katak ita-nia militár sira ba eskola militár ne’ebé mak prestiziadu iha mundu no sira hetan ita-nia alunu ka ita-nia militár ba eskola iha ne’ebá ba balun fila sai ofisiál ne’ebé mak di’ak tebes”, Donanciano Costa Gomes Pedro Klamar Fuik, hateten ba jornalista hafoin hasoru malu ho Embaixadora EUA ba Timor-Leste, Donna Ann Weltton iha Ministériu Defeza Fatuhada, sesta ne’e.
Klamar Fuik esplika, Timor-Leste no Estadu Unidus Amérika hanesan belun di’ak ne’ebé mak iha relasaun di’ak ona tanba hanesan ita bo’ot sira hatene katak Estadus Unidus Amérika dezde períodu mais difisil iha 1999 apoia iha setór defeza.
“Depoizde 1999 to’o ohin loron Estadu Unidus Amérika sempre kontinua fó apoiu nesesáriu iha área hotu iha setór hotu inkluzivamente iha setór defeza”, nia adianta.
Governante ne’e rekorda katak kooperasaun ne’ebé EUA halo ho Timor-Leste iha área defeza mak fó asisténsia ona iha área reabilitasaun Aeroportu Baucau no apoia aviaun Cessna no promove ezersísiu barak ho forsa armada Timor-Leste atu bele artikula ba forsa profisionál iha nivél internasionál ba kualker misaun.
“Sira-nia apoia ba ita-nia forsa mak misaun apoia ba pás, misaun apoia emerjénsia, kalamidade ruma no misaun apoia sivil militár. Portantu señora emabaxadora ohin ami naturalmente koalia kona-ba kooperasaun ne’ebé mak Estadus Unidus Amérika iha ho Timor-Leste iha ambitu defeza”, nia afirma.
Iha fatin hanesan, Embaixadora Estadus Unidus Amérika (EUA) ba Timor-Leste, Donna Ann Weltton, dehan diskusaun klean, ohin, iha ministériu, kona-ba kooperasaun bilaterál iha área defeza no ami mós enfatiza importánsia husi ita-nia kooperasaun defeza ne’e rasik.
“Ami mós hakarak ba oin atu halo kooperasaun di’ak ho Nuno Governu Konstituisionál, atu nune’e, bele atinje ninia prioridade sira durante nia governasaun iha área defeza nian. Nune’e mós hanesan ohin ami anota ona katak kooperasaun ne’e tenke benefisia entermus ekonómiku ba povu no país Timor-Leste”, nia konklui.
Jornalista: Natalino Costa
Editór : Zezito Silva
