Governu nomea Marito Ferreira nu’udar Prezidente Konsellu Administrasaun foun EDTL, E.P
DILI, 04 outubru 2024 (TATOLI)—Governu liuhusi reuniaun ordinária Konsellu Ministru (KM), kuarta (25/09) ne’e, aprova rezolusaun Governu hodi nomea Marito Ferreira nu’udar Prezidente Konsellu Administrasaun Eletrisidade de Timor-Leste, Empreza Públika (EDTL, E.P), ne’ebé desizaun ne’e sei tama iha vigór hahú loron 01 novembru 2024.
“Konsellu Ministru deside ona atu hapara Paulo da Silva husi kargu Prezidente Konsellu Administrasaun EDTL, E.P, no nomeia fali Marito Ferreira nu’udar ninia susesór, ba mandatu tinan haat nia-laran,” referidu nota ezekutivu ne’ebé Agência Tatoli asesu, sesta ne’e.
Iha loron 06 janeiru 2021, Governu nomea Paulo da Silva nu’udar Prezidente Konsellu Administrasaun EDTL, E.P , ba mandatu tinan-haat.
Notísia relevante : Paulo da Silva nomeadu nu’udar Prezidente Konsellu Administrasaun EDTL,E.P
Antes ne’e, EDTL hanesan diresaun jerál ne’ebé tutela iha Ministériu Obra Públika (MOP), maibé Governu atu kria medida estruturante ba setór eletrisidade liuhusi kriasaun estatutu instituisaun ne’e.
EDTL sei apoiu Governu ba definisaun polítika rekursu enerjétiku, halo planu eletrifikasaun nasionál, promove uza efisiente enerjia elétrika, asegura fornesimentu enerjia elétrika ba konsumu, kualidade konsumu, hadi’a sistema integradu automatizasaun no komunikasaun, medida ba kontrolu no inspesaun ba eliminasaun konesaun ilegál, inklui ezerse atividade importasaun no esportasaunenerjia elétrika.
Iha loron 20 jullu 2020, Prezidente Repúblika promulga dekretu-lei kona-ba kriasaun empreza públika (EDTL, E.P) no ninia estatutu.
Empreza estatál ne’e harii iha tinan 2020 no iha misaun atu asegura prestasaun efisiente ba servisu esensiál sira ba populasaun. EDTL, E.P maka responsável atu hadi’a no haluan rede fornesimentu enerjia elétrika iha territóriu nasionál.
Hafoin dekretu-lei vigora, MOP hahú estabelese komisaun instaladora hodi halo tranzisaun no preparativu ba transformasaun husi diresaun ba empreza públika.
Jornalista : Osória Marques
Editora : Julia Chatarina
