DILI, 04 outubru 2024 (TATOLI)—Meza Parlamentu Nasionál (PN), sei baixa proposta-lei Orsamentu Jerál Estadu (OJE) 2025 ba komisaun C trata asuntu Finansa Públika no komisaun permanente sira seluk hodi elabora prosesu tuir mai iha semana oin.
“Segunda-feira (07 Outubru) ami baixa, tanba hato’o iha 01 outubru 2024, ha’u tenke haree no ohin lorokraik sei lori ezemplar (livru dokumentu) ba Deputadu hotu-hotu. Depois hato’o ona ba DIPLN haree admisibilidade tuir duni lei ka lae, sira-nia proposta sira-ne’e iha asuntu balun ne’ebé ami halo pergunta ba sira haree no sira mai hato’o, ne’ebé konfirma hotu ona la’o di’ak,” Prezidente Parlamentu Nasionál, Maria Fernanda Lay, hateten ba Agência TATOLI iha PN, sesta ne’e.
Nune’e, nia hateten, iha semana oin ne’e meza Parlamentu Nasionál (PN) sei baixa ba komisaun permanente hodi elabora prosesu tuir mai.
Antes ne’e, iha 02 outubru 2024, Deputadu sira Komisaun C hahú diskute preparasaun kalendáriu debate proposta-lei OJE 2025.
Prezidente Komisaun C, Cedelízia Farria dos Santos, dehan iha enkontru komisaun komesa haree ona preparasaun ajenda diskusaun, audiénsia ba proposta-lei OJE 2025, hodi hein meza PN sei baixa proposta-lei OJE 2025 mai komisaun liuhusi reuniaun plenária iha semana oin.
Nia hateten, komisaun hahú halo analize no dokumentu sira-ne’ebé mai komisaun sei realiza panorama orsamentál, no audiénsia públika tuir ezbosu kalendáriu sei realiza hahú iha 21 outubru 2024 ho liña ministerial sira.
Tanba, tuir nia, pedidu husi Governu debate proposta-lei OJE 2025 tama ho kategória normál, mak ita sei presiza loron 45 atu aprova finál globál iha plenária.
Enkuantu, iha 01 outuburu 2024, Governu liuhusi Ministra Finansa (MF), Santina Cardoso, submete ona proposta-lei OJE 2025 ho montante billaun $2.6 ba PN.
Notísia Relevante: Governu submete proposta-lei OJE 2025 biliaun $2,6 ba PN
Jornalista : Nelson de Sousa
Editór : Cancio Ximenes
