VIQUEQUE, 04 outubru 2024 (TATOLI)-Ministru Obra Públika (MOP), Samuel Marçal, hamutuk ho Autoridade munisípiu Viqueque no Autoridade Baucau, sesta ne’e, lansa fatuk dahuluk ba projetu konstrusaun estrada husi Postu Uatulari, munisípiu Viqueque bá Laisorulai, munisípiu Baucau ho distánsia kilómetru 22.
“Projetu konstrusaun estrada ne’e empreza sei finaliza iha loron 3 Apríl 2026 , nune’e ha’u husu ba autoridade no komunidade sira tenke kolabora hamutuk ho empreza implementadór hodi tau matan ba ba projetu ne’e,” Ministru Samuel hatete iha serimonia lansamentu, iha postu Uatulari, ohin.
Governante ne’e mós husu, ba komunidade no autoridade sira parte Uatulari no Baucau atu koopera ho empreza hodi labele halo impedimentu ba projetu referidu.
“Iha fatin balun husu estrada, maibé bainhira ita ba halo sira maka halo fali impedimentu tanba ne’e ha’u husu povu Uatulari labele trava servisu empreza. Tanba estrada atu hamoris povu nian ekonómia, laiha estrada ekonómia sei la’o ladun di’ak no povu mós sei moris ladun di’ak”, nia afirma.
Tuir planu durante mandatu Governu dasia mak konstrui estrada nasionál, munisípiu, urbana no rurál bele atinji kilómetru 3.200.
Alende ne’e Ministru husu mós ba empreza internasionál husi Xina Shanghai Konstrusaun ne’ebé sai manan nain ba konstrusaun ho responsabilidade hodi garante ba kualidade estrada.
Iha fatin hanesan, Prezidente Autoridade munisípiu Viqueque, Francisco Cruz S. de Gonzaga Soares, husu agradese ba Governu liuhusi MOP ne’ebé konsege lansa ona projetu estrada.
“Ohin Ministru hatu’ur ona fatuk dahuluk ba konstrusaun estrada, signifika naroman mai ona. Tanba durante ne’e estrada sai difikuldade ba povu Viqueque. Ha’u husu ba komunidade sira labele impede naroman no ita labele taka dalan ba dezenvolvimentu”, PAM Viqueque subliña.
Projetu konstrusaun estrada husi Uatulari to’o Laisorulai hamutuk kilòmetru 22, ho orsamentu hamutuk $18,462,610.14, projetu referida ho duransaun kontratu hahú loron 18 Outubru 2024 no sei ramata iha loron 3 Abríl 2026.
Jornalista : Vitorino Lopes da Costa
Editór : Florencio Miranda Ximenes
