COVALIMA, 04 Outubru 2024 (TATOLI) – Servisu Munisipál ba Rejistu Notariadu no Servisu Kadastrál halo ona levantamentu dadus ba proprietáriu Estadu ne’ebé komunidade utiliza iha postu Tilomar no Suai.
“Ita ko’alia kona-ba kadastrál nia servisu atu halo identifikasaun ba sidadaun ne’ebé utiliza rai no uma ne’ebé pertense ba Estadu. Ami halo levantamentu bazeia ba númeru parsela rai no uma Estadu komunidade sira utiliza”, Diretór Servisu Notariadu no Servisu Kadastrál, António Sarmento, dehan iha Bairru Rompe.
Nia esplika katak Servisu Kadastrál halo identifikasaun ba rai no uma Estadu ne’ebé komunidade uza ho intensaun atu regulariza no atividade ne’e tanba serbisu hamutuk ho Terra no Propriedade Covalima hodi halo kontratu arrendamentu ba komunidade ne’ebé utiliza rai no uma Estadu.
Durante ne’e, Servisu Kadastrál halo identifikasaun ba pooulasaun ne’ebé utiliza rai no uma Estadu hamutuk 90, maibé kona-ba atu halo kontratu arrendamentu sei submete karta ba Terra no Propriedade.
Diretór Terra no Propriedade Covalima, Carlos Caetano, dehan sira hamutuk ho Servisu Munisipál Notariadu no Servisu Kadastrál halo levantamentu dadus ba rai no uma ne’ebé komunidade sira utiliza ho intensaun atu submete prosesu kontratu arrendamentu.
“Foin lalais ita halo levantamentu ba komunidade ne’ebé utiliza rai Estadu iha Suai Loro tasi-ibun no finaliza ona halo prosesu kontratu arrendamentu hodi kontribui reseita ba kofre Estadu”, nia esplika.
Kontratu arrendamentu ba komunidade ne’ebé utiliza rai Estadu tuir medida rai ne’ebé utiliza, nune’e populasaun balun selu kada fulan mínimu $5 no máximu $47.
Ba abitante ne’ebé utiliza rai eis-transmigrasaun iha Salele-Tilomar, iha 2017, halo ona prosesu arrendamentu to’o 2021 mak paradu, tanba rona palestra husi eis-Ministra Justisa, Lúcia Lobato, katak pendente hodi hein regra hafoin bele kontinua.
Nune’e, Terra no Propriedade Covalima submete ona karta ba Sekretáriu Estadu Terra no Propriedaade no iha ona despaixu atu kontinua halo kontratu arrendamentu iha fatin ne’e ho nia kustu kada fulan $15.
Jornalista: Celestina Teles
Editora: Maria Auxiliadora
