COVALIMA, 05 outubru 2024 (TATOLI)—Terra no Propriedade Covalima, hahú husi janeiru to’o agostu 2024 ne’e, kontribui ona reseita $35,800 ba kofre Estadu.
Diretór Terra no Propriedade Covalima, Carlos Caetano, hateten Terra no Propriedade kontribui reseita ne’e ninia fonte mai hosi komunidade okupa rai Estadu hodi kontribui arrendametu rai, liliu ba komunidade ne’ebé utiliza rai halo komérsiu, eskritóriu no uza ba rezidénsia.
“Reseita ne’ebé ami kontribui husi janeiru to’o agostu, ba fulan-setembru nian ne’e ami seidauk sura tanba seidauk simu relatóriu husi Banku,” Carlos Caetano relata dadus ne’e ba jornalista sira iha Bairru-Rompe.
Bazeia ba lei númeru 1/2003 ko’alia kona-ba tipu arrendamentu mak hanesan tipu arrendamentu rai privadu no rai Estadu
Sidadaun ne’ebé halo arrendamentu depende medida rai ne’ebé sira utiliza minimu ne’e selu $5 no másimu $15 kada fulan.
Ho nune’e, Terra no Propriedade Covalima kontribui ona reseita $ 35,800 maibé depende mós sidadaun sira halo arrendamentu hodi selu iha banku.
Tuir dadus husi Terra no Propriedade Covalima haktuir, rejista sidadaun selu permanente hodi okupa rai Estadu hamutuk 48.
Jornalista : Celestina Teles
Editór : Cancio Ximenes
