Bebé Kaynoy fila tanba konsumu foer iha kabun-laran
DILI, 07 outubru 2024 (TATOLI) – Hospitál Nasionál Guido Valadares (HNGV) rekoñese inan isin rua ne’ebé evakua husi Sentru Saúde Aimerleu, Postu Administrativu Hatu-Udo, Munisípiu Ainaro mai HNGV nia bebé Kaynoy Araujo Gomes moris depois loron rua maka mate tanba konsumu nia foer iha inan nia kabun-laran.
“Inan isin rua ida evakua mai hodi partu ida HNGV, depois loron rua bebé mate, ida-ne’e akontese duni iha ne’e no ita haree família kestiona makas maibé tuir investigasaun ne’ebé mak iha katak antes bebé moris mai konsumu ona nia foer”, Diretór Servisu Apoiu Diagnóstiku no Terapeútiku, Vidal de Jesus Lopes ba jornalista iha HNGV, ohin.
Vidal informa, bebé ne’ebé mate tanba han ona nia foer rasik tanba oksijéniu ba iha kakutak labele ona, entaun fó impaktu ba bebé nia vida.
“Bebe antes moris mai iha kabun-laran han ona nia foer rasik no oksijéniu ba kakutak ne’e labele ona tanba ita-nia oksijéniu ba iha ita-nia kakutak ne’e sensitifivu liu, entaun bele fó impaktu ba bebé nia vida”, nia esplika.
Diretór haktuir, HNGV iha duni estajiadu maibé ho kazu ne’ebé mak komplikadu, estajiadu sira la fó atendimentu maibé ida-ne’e entrega ba médiku sira mak atende.
“Ita iha ne’e estajiadu iha duni, maibé responsabilidade sempre iha médiku, enfermeiru no parteira sira mak monitoriza, laos husik fali ba estajiadu mak kaer kazu, tanba kazu sira komplikadu ne’e parteira sira seniór sira mak akonpaña, la autoriza estajiáriu mak halo”, nia deklara.
Antes ne’e, família pasiente lamenta ho atendimentu profisionál saúde iha HNGV tanba la tau atensaun másimu ba kondisaun bebé no husik de’it ba estajiáriu sira mak atende to’o hakotu i’is iha sala ICU.
“Iha momentu ne’ebá ami lamenta tebtebes mak profisionál saúde sira la tau atensaun másimu ba kondisaun bebé nian no husik de’it ba estajiáriu sira mak atende to’o hakotu i’is iha sala ICU bebé nian. Maske família buka alternativu seluk atu fó netik buat ruma ba bebé konsumu, maibé pesoál sira la aseita hodi husik de’it nune’e durante loron rua nia laran to’o bebé hakotu iis, maske bebé bele tanis no sintina normál”. família Pasiente Rosantino Gomes konklui.
Jornalista : Felicidade Ximenes
Editór : Zezito Silva
