COVALIMA, 07 Outubru 2024 (TATOLI) – Autoridade Munisípiu Covalima, propoin millaun $8,3 iha proposta Orsamentu Jerál Estadu (OJE) 2025, informa Diretora Servisu Munisipál Finansa Covalima, Rosita Semei Freitas.
Orsamentu ne’e atu finansia programa 15, subprograma 31 no atividade 74 ne’ebé sei implementa iha tinan oin.
OJE 2025 ba Covalima fahe ba rúblika lima hanesan saláriu no vensimentu millaun $2,7, bens no servisu $835.130, transferénsia públika $3,8, kapitál menór rihun $150 kapitál no dezenvolvimentu $846.874.
Rosita Freitas esplika katak autoridade Covalima aloka orsamentu ba kapitál no dezenvolvimentu ba projetu tolu hanesan konstrusaun postu saúde iha Fatumea no Fohorem no konstrusaun irrigasaun iha suku Beco, postu Suai.
“Orsamentu 2025, Covalima propoin $8,293.634 kompara ho OJE 2024 mak $7.256.651, ne’ebé aloka ba saláriu no vensimentu $2,336.743, bens no servisu $846.885, transferénsia públika $2,556.011, kapitál menór $166.820, kapitál no dezenvolvimentu $1,350.192”, responsavel ne’e relata ohin.
Nia salienta katak OJE 2024 finansia programa 13 subprograma 31 ho atividade 74 tuir planu asaun anuál (PAA) ne’ebé aprezenta husi kada Diresaun Servisu Munisipál sira.
Nia adianta katak ezekuasaun OJE 2024 ba munisípiu Covalima nian iha trimestre ba datoluk ne’e atinje ona 63,9%.
Notísia relevante: Covalima atinje ezekusaun orsamentál 61,4%
Jornalista: Celestina Teles
Editora: Maria Auxiliadora
