Deputadu KHUNTO husu tau atensaun ba projetu eletrifikasaun iha Hatolia
DILI, 07 outubru 2024 (TATOLI)—Deputadu KHUNTO, António Verdiál de Sousa, husu Sekretária Estadu Eletrisidade atu tau atensaun ba preokupasaun komunidade kona-ba ai-riin eletrisidade ne’ebé harii dezde iha tinan 2027, maibé to’o agora seida’uk instala fiu iha suku Hatolia Vila, postu administrativu Hatolia A, munisípiu Ermera.
Nia dehan, foin lala’is hala’o viajen ba Hatolia hasoru xefe aldeia Simo-hei ne´ebé reprezenta populasaun 2.000 resin, ho juventude sira hodi hato´o sira-nia preokupasaun interligadu ho ai-riin eletrisidade 43 ne´ebé kompañia AIROMA UNIP, LDA, ba harii dezde 2017, maibé to´o ohin loron seidauk installa fiu ba besi riin hirak ne´e.
“Komunidade koopera hodi tesi hotu ai-mahon ba kafé ne´ebé mak fó ameasa ba riin eletrisidade hirak ne´e. Tanba ne´e mak xefe aldeia ho nia populasaun sira nafatin rekomenda ba Governu liuliu Sekretária Estadu Eletrisidade atu tau atensaun sériu ba sira-nia preokupasaun ne’e, Tanba dezde kompañia AIROMA UNIP, LDA ba harii besi riin hirak ne´e, to´o ohin loron komunidade sente taka dalan ba parte seluk atu bele tau matan ba sira iha parte eletrisidade hodi bele fó naroman ba sira-nia oan sira bele estuda iha tempu kalan,” Nia levanta liuhusi reuniaun plenária, segunda ne’e.
Aleinde ne’e, nia dehan, iha aldeia refere tempu udan besik daudaun hanesan ne´e komunidade susar tebes atu asesu ba klínika, merkadu, eskola no Igreja, no susar tebes ba ajénsia hirak hanesan CARE atu ba asesu audit iha eskola primaria ne´ebé lokaliza iha aldeia Simo-hei Talo.
Tanba, tuir nia, dalan mak la favorese ba sira maske nune´e komunidade obrigadu la’o ain kilometru lima (5) to’o hitu (7) hodi asesu ba klínika, merkadu, Igreja no liu-liu estudante sira atu asesu ba eskola pré-sekundaria no sekundária.
Reprezentante Governu, liuhusi Sekretária Estadu Igualidade Jéneru, Elbina de Sousa, rejista preokupasaun refere sei enkamina ba entidade tutela hodi tau atensaun.
Jornalista : Nelson de Sousa
Editór : Cancio Ximenes
