Investigasaun Interna ospitalár ba Samuel
DILI, 07 outubru 2024 (TATOLI) – Diretór Servisu Apoiu Diagnóstiku no Terapeútiku Hospital Nasionál Guido Valadares (HNGV), Vidal de Jesus Lopes, hateten Doutór Samuel ninia diploma orijinál hasai neurolojista iha Universidade Havana Cuba iha tinan 2012.
“Iha semana rua ba kotuk, ita-nia investigasaun no auditorium lao duni iha nivel internál HNGV kona-ba Dr Samuel nian, entaun ami halo kooperasaun no koordenasaun ho parte kompetente sira, Ensinu Superiór husi Ministériu Edukasaun atu haree didiak ninia orijinalidade husi diploma, orijinál ka lae no ensinu superior deklara katak ho numeru Ref:0297/DGESC/MESCC/IX/2024 iha loron 24 setembru 2024, diploma husi Dr Samuel nian ne’e orijinál no nia hasai ninia neurolojista iha tinan 2012 iha Universidade Havana Cuba”, Vidal de Jesus Lopes, dehan iha HNGV, ohin.
Nia afirma, deklarasaun ida-ne’e laos HNGV mak fó sai maibé husi orgaun kompetente sira mak fó sai katak Dr Samuel ne’e neurolojista.
“Ida-ne’e laos konsellu Diretivu HNGV mak dehan maibé orgaun kompetente seluk ne’ebé mak hatene liu ba asuntu ne’e mak deklara no ofisialmente fó sai katak Dr Samuel ne’e neurolojista duni, karik iha dezentendimentu iha sala tratamentu ruma ne’ebé mak médiku sira husi neurolojista sira preokupa mak presiza halo lai sosializaun ba servisu iha Timor ne’e hodi nia adapta didiak atu nune’e nia bele familiariza ba tratamentu protokolu tuir kontestu HNGV nian”, nia esplika.
Antes ne’e, Diretora Ezekutiva HNGV, Cecilia Barros Mendonça, dehan ospitál deklara no halo duni kontratu ba Dr Samuel hodi halao kna’ar nu’udar espesialista neurolojia ho dokumentu komprovativu.
“Ami rasik fó kontratu ba Dr Samuel hanesan espesialista neurolojia tanba nia mai ho dokumentu komprovativu tanba ita mos menus espesialista ba ida ne’e ita iha duni timoroan ba neurolojista, maibé iha momentu ne’eba espesialista neurolojia ne’e asume tiha knaar nu’udar Diretór Ezekutivu iha INFPM, entaun ita menus rekursu mak ita kontratu Dr Samuel mai servisu iha HNGV”, Diretora Ezekutiva Hospitál Nasionál Guido Valadares”, nia konklui.
Jornalista : Felicidade Ximenes
Editór : Zezito Silva
