PM Xanana dezloka bá Laos partisipa simeira ASEAN ba dala-44
DILI, 07 outubru 2024 (TATOLI) – Primeiru-Ministru (PM), Kay Rala Xanana Gusmão, segunda ne’e, arranka ona bá Repúblika Demokrátika Populár (RDP) Laos, hodi partisipa Simeira Association of Southeast Asian Nations (ASEAN) ba dala-44 no 45, ne’ebé sei realiza iha loron 08 to’o 11 Outubru 2024, ho tema prinsipál “ASEAN: Aumenta Konetividade no Rezilénsia”.
Tuir nota ne’ebé Ajénsia TATOLI, I.P asesu katak, Xefe Governu Xanana Gusmão partisipa iha Simeira ne’e tanba hetan konvite husi Primeiru-Ministru Laos, Sonexay Siphandone ne’ebé atualmente lidera Prezidénsia ASEAN nian.
Iha sekuénsia konvite ne’e, Kay Rala Xanana Gusmão sei partisipa mós iha Simeira Xefe Estadu no Xefe Governu ASEAN nian ba dala-44 no 45 iha Vientiane.
Dadaun ne’e, Timor-Leste hanesan observadór ASEAN nian no tuir planu sei integra-an hanesan membru plenu iha tinan 2025.
Iha simeira ne’e, Primeiru-Ministru akompañadu husi Xefe Estadu no Xefe Governu nasaun membru ASEAN nian ho parseiru sira mak hanesan Índia, Xina, Japaun, Canadá, Estadus Unidus Amérika (EUA), Austrália, Nova Zelândia, Rússia, Uniaun Europeia, Nasaun Unidas no Repúblika Coreia. Posibilidade sei marka prezensa mós husi Sekretáriu Jerál Organizasaun Nasaun Unidas (ONU), António Guterres.
Hafoin partisipa Simeira ASEAN, Primeiru-Ministru Xanana Gusmão sei kontinua vizita ofisiál bá Portugal iha loron 12 to’o 18 Outubru, ho ajenda atu hasoru-malu ho Prezidente Repúblika Portugal, Marcelo Rebelo de Sousa, Prezidente Assembleia Repúblika, Pedro Aguiar-Branco, no Primeiru-Ministru Portugal, Luís Montenegro.
Durante enkontru entre Primeiru-Ministru na’in-rua, sei ko’alia liu kona-bá kooperasaun iha área justisa, edukasaun no seguransa ne’ebé sei asina mós akordu bá programa kooperasaun estratéjiku ho Portugal bá tinan 2024 to’o 2028 mak hanesan; Programa Reabilitasaun, Patrimóniu no Turizmu; no akordu ida kona-bá infra-estrutura, hanesan sinál espansaun kontínua bá relasaun bilaterál ne’ebé forte.
Primeiru-Ministru mós sei hasoru-malu ho komunidade Timoroan iha Portugal, Akadémiku portugueza no sosiedade sivíl, inklui atende konvite hosi Governu Rejionál Açores hodi vizita illa ne’e no koñese projetu oioin ho atividade ekonomia azúl.
Primeiru-Ministru mós sei hala’o reuniaun ho Sekretáriu Ezekutivu CPLP no reprezentante Estadu membru CPLP nian.
Iha vizita ofisiál ne’e, Primeiru-Ministru akompañadu hosi Vise-Primeiru-Ministru no Ministru Koordenadór Assuntu Ekonómiku no Ministru Turizmu no Ambiente, Francisco Kalbuadi Lay, Ministru Negósiu Estranjeiru no Kooperasaun, Bendito dos Santos Freitas, Ministru Justisa, Sérgio de Jesus Fernandes da Costa Hornai, Ministra Edukasaun, Dulce de Jesus Soares, Ministru Ensinu Superiór no Siênsia, José Honório da Costa Pereira Jerónimo, Ministru Interiór, Francisco da Costa Guterres, Vise Ministra Asuntu ASEAN, Milena Rangel, Sekretáriu Estadu Komunikasaun Sosiál, Expedito Dias Ximenes, Prezidente Câmara Comércio no Indústria Timor-Leste (CCI-TL), Jorge Serrano, mídia no delegadu ofisiál sira seluk.
Tuir ajenda, hafoin fila hosi Portugal, Primeiru-Ministru Xanana Gusmão sei dezloka bá Indonézia atu assiste Serimónia Posse Prezidente Repúblika Indonézia bá dala-8, Prabowo Subianto iha 20 Outubru iha Jakarta.
Durante vizita ofisiál Primeiru-Ministru Xanana Gusmão iha estranjeiru, Vise-Primeiru-Ministru no Ministru Koordenadór Dezenvolvimentu Rurál no Habitasaun Komunitária, Mariano Assanami Sabino, mak sei koordena Governu.
Jornalista: Hortencio Sanchez
Editór: Florencio Miranda Ximenes
