DILI, 08 outubru 2024 (TATOLI)–Portavós Asosiasaun Akadémika Estudantíl Fakuldade Agrikultura iha Universidade Nasionál Timor-Lorosa’e (UNTL), Anita Campos Gama, hateten, iha dosente balun abandona aula ensinu aprendizajen iha Fakuldade Agrikultura (FAGRI).
“Dosente Abílio da Fonseca abandona aula no abandona serbisu administrasaun sira iha Departamentu Peska Siénsia no Mariña (DPCM, sigla portugés) hodi halo serbisu fali iha Ministériu Komérsiu no Indústria (MKI), iha Diresaun Nasionál Peskiza no Estatístika, ne’ebė tama serbisu iha oras 08:00-17:00, enkuantu iha tempu hanesan oráriu serbisu iha DPCM-UNTL tama serbisu oras tuku 08:00-17:00, signifika Abílio da Fonseca halo korrupsaun ba tempu hodi hetan saláriu dupla no abandona aula estudante sira-nian, nune’e husu Reitór atu solusiona problema ne’e,” Portavós hato’o liuhusi konferénsia imprensa, iha UNTL Sentrál, Colmera, tersa ne’e.
Nia dehan, dosente ne’e halo plájiu no tráfiku ba obra sientífika bainhira orienta hela estudante sira-nia monografia (ódiu no vingansa). Aleinde ne’e, manipula atividade viajen lokál husi atividade estájiu serbisu profisionál iha kampu, iha munisípiu Liquiçá iha tinan 2024, liuhusi aktu asina dokumentu viajen lokál ne’e ameasa estudante sira atu lori ba Komisaun Antí-Korrupsaun (CAC, sigla portugés) no Dekanu FAGRI, inklui ameasa estudante bainhira halo keixa kona-ba manipula atividade viajen lokál ba parte kompetente maka estudante ne’e sei la tuir estájiu sosiál.
“Tanba ne’e, husu Reitór UNTL, João Soares Martins, atu halo demisaun ka hasai kedas dosente Abílio da Fonseca, ho durasaun tempu loron-tolu nia laran tanba problema ne’e la’ós foin maka akontese, maibé akontese antese ona iha tinan 2023 to’o ohin loron no estudante sira barak maka sai vítima liu ona ba aktu istúpidu sira-ne’e,” nia tenik.
Nune’e, estutura Asosiasaun Akadémika Estudantíl FAGRI hamutuk ho estudante ativu no finalista sira DPCM hein rezultadu husi Reitór UNTL ho nia estrutura tomak, atu fó solusaun imediatu ba problema no preokupasaun ida-ne’e.
“Estudante barak mak sai tiha ona vítima. Karik laiha ona solusaun ba problema no preokupasaun sira-ne’e. Entaun husik estutura Asosiasaun Akadémika Estudantíl FAGRI hamutuk ho estudante ativu no finalista sira DPCM maka sei rezolve de’it iha tempu badak nia laran liuhusi asaun halo protestu koletivu no greve tuir Kódigu Konduta UNTL, artigu 16º númeru 6, karik bainhira laiha ona solusaun ba preokupasaun sira-ne’e tanba estudante sira iha DPCM sai vítima beibeik,” nia katak.
Notísia relevante : Pro-Reitór UNTL konsidera presiza iha jestaun no tempu di’ak ba utilizasaun saladeaula
Estrutura asosiasaun nota mós katak dosente Abílio da Fonseca la kumpre ona akta enkontru iha FAGRI no iha UNTL, ne’ebé problema rezolve ona iha tinan 2023 maibé nafatin kria problema oin-oin ha estudante ativu no finalista.
“Nia uza sistema familiariszmu no rasizmu hodi promove asistente sira ilegalmente iha DPCM hodi orienta estudante anak emas sira hodi fó orientasaun fali estudante seluk iha proposta peskiza, resultadu peskiza no monografia. Laiha étika no disiplina nu’udar dosente tanba soe no lees estudante nia KRS. Dosente Abílio da Foriseca halo tratamentu la justu no la transparánsia ba estudante sira, ne’ebė komete aktu bolu malu de’it ba tuir projetu ruma. Iha tinan 2024 atualmente la’o hela, liuhusi dalan bolu malu de’it no la liu hosi teste ruma,” Portavós hato’o.
DPCM eziste ona durante tinan-hitu iha FAGRI -UNTL, maibé foin maka prodúz graduadu hamutuk 17.
Tuir regulamentu akadémiku UNTL artigu 6º kréditu ECTS, alinea 3 hateten, ba grau lisensiadu nia kréditu maka entre 180-240 European Credit Transfer System (ECTS) ho durasaun normál maka semestre ualu, signifika estudante ida presiza de’it tinan 4-5 tenke gradua ona. Maibė realidade maka estudante sira iha DPCM bele eskola to’o semester 16.
Hatan ba kestaun ne’e, Jornalista Agência Tatoli seidauk konsege hetan konfirmasaun husi parte Reitór no dosente ne’e rasik.
Jornalista : Osória Marques
Editora : Julia Chatarina
