Ema ne’ebé mate derepente maioria moras fuan
DILI, 08 outubru 2024 (TATOLI) – Espesialista Emerjénsia iha Hospitál Nasionál Guido Valadares (HNGV) Sidonio da Silva, hateten ema ne’ebé mak mate derepente iha otél, sira-ne’e maioria problema fuan.
‘’Ema nia prespetiva katak ema sira ne’e nusa mak mate iha otél laran, maibé tuir médiku katak ema di’ak hela, maibé to’o mate fatin, ida-ne’e antes nia sofre moras fuan”, Sidonio da Silva informa ba TATOLI bainhira hala’o entervista ezklusiva iha estudiu TATOLI,I.P Farol, horseik.
Nia esplika, ai-moruk ne’ebé nia konsumu ne’e atu ajuda nia halo atividade seluk maibé obriga fuan hodi halo servisu dobru husi atividade ne’ebé mak nia halo, entaun ida-ne’e mak halo fuan para derepente no mate iha otél. Iha balun fuan di’ak no forte, maibé ba toba iha otél mak fuan para, ida-ne’e posivelmente nia konsumu ai-moruk ne’ebé mak medis dehan aumenta lívidu seksuál ka rendimentu seksuál husi mane nian, entaun ai-moruk ne’e iha risku ba ema nia vida.
“Ai-moruk ne’e dalabarak ema bolu dehan viagra, maibé ida-ne’e naran komersiál iha komponente kímiku ne’ebé mak iha laran ne’e ema bolu dehan sildenafim, husi sildenafim ne’e hanesan komponenete kímiku ida ba ema sira ne’ebé mak livre seksuál no hakarak aumenta nia rendimentu hemu hodi sira bele hetan objetivu ida katak hakarak maibé risku sira lahatene entaun halo sira mate derepente”, nia relata.
Nia afirma, ai-moruk ne’ebé mak ema ne’e konsumu dalabarak nia dozes boot depois ka ema ne’e mós enfrenta moras fuan entaun bele afeta ba ida-ne’e.
“Se nia konsumu ai-moruk iha momentu ne’eba, dalaruma dozes liu, maske nia problema tan fuan mak nia konusmu ai-moruk ne’e halo nia mate”, nia dehan.
Tanba ne’e, médiku espesialista ne’e husu ba ema hotu nafatin kontrola fuan iha fasilidade saúde ne’ebé de’it. nune’e bele hatene kondisau fuan nian.
Jornalista : Felicidade Ximenes
Editór : Zezito Silva
