Kadavér traballadór timoroan ne’ebé lakon vida iha Austrália to’o ona TL
DILI,08 outubru 2024 (TATOLI)— Novidade triste ba família, belun no kolega sira. Moris iha Timor-Leste, lakon vida iha Austrália, Guido Pinto ho idade 33 nu’udar traballadór timoroan ida. Ohin, tuku 15h10 nia kadaver to’o iha Aeroportu Internasionál Nicolau Lobato, Dili, ho aviaun Qantas, Austrália nian.
“Iha fulan kotuk ita hotu hatene novidade triste mai ita liu husi ita-nia traballadór ne’ebé mak envolve aan iha iha programa servisu iha Austrália. Ita la espera iha komemorasaun loron 30 agostu ne’ebé mak ita-nia maun alin sira halibur hamutuk, maibé triste ne’ebé mak ita rona katak ita-nia maun ne’e sofre korasaun to’o monu iha ne’eba no konsegue lori ba ospitál, maib’e la konsegue salva nia vida,” Diretór Nasionál Empregu Estamjeiru husi Sekretáriu Estadu Formasaun Profisionál no Empregu (SEFOPE), João Correia dehan ba jornalista iha resintu uma matebian Beto, ohin.
Matebian Guido Pinto, tuir diretór ne’e, nia ba servisu iha Austrália iha tinan-2023 to’o hakotu iis iha Austrália no husik oan na’in rua no família sira.
Iha fatin hanesan, reprezentante família, António da Luz triste rona novidade ‘moruk’ ida-ne’e tanba família fó esperansa katak sira ba hodi buka moris, oinsá fila mai bele sustenta feen no oan no família sira. Maibé, realidade ida-ne’ebé hatudu oin seluk. “Entaun ida-ne’e mak hatudu ba família katak hakarak ga lakohi simu realidade ida-ne’e”.
“Ha’u lori família no oan-ki’ak hakarak agradese ba Governu Timor-Leste no Governu Austrália ne’ebé mak ho kooperasaun di’ak tebes liuhusi SEFOPE nia tulun hodi organiza, ohin lori fila fali ita-nia matebian Guido Pinto husi Austrália mai ita-nia rain,” António da Luz hato’o.
Reprezentante família ne’e haktuir, matebian Guido Pinto atakasaun mate, maibé husi parte Forensic sei halo identifikasaun entaun ida-ne’e mak prosesu to’o han tempu fulan ida, maibé ohin família agradese tanba matebian to’o ona Timor-Leste.
“Matbian aban sei halo nia misa funebre iha igreja Santo Antonio Motael, sei lori liu ba nia moris fatin iha Aitana Lacluta Munisípiu Viqueque hodi halo funebre tuir tradisaun ne’ebé mak iha,” nia konklui.
In memoriam!
Jornalista : Felicidade Ximenes
Editór: Rafael Ximenes de A. Belo
