Top

Komisaun D rekomenda MAPPF tau planu konstrui irrigasaun Bonuk-Ainaro

Ilustrasaun Irrigasaun. Imajen/Espesiál

DILI, 08 outubru 2024 (TATOLI)—Komisaun D trata asuntu Ekonomia no Dezenvolvimentu iha Parlamentu Nasionál (PN) rekomenda ba Ministériu Agrikultura, Pekuária, Peska no Floresta (MAPPF) atu tau planu orsamentu hodi konstrui irrigasaun foun iha Bonuk, área suku Leolima, postu administrativu Hato-udo, munisípiu Ainaro.

Prezidente Komisaun D iha Parlamentu Nasionál, Ricardo Baptista ne’ebé akompañadu husi deputadu membru komisaun iha 10-12 jullu 2024 hala’o fiskalizasaun iha baze hodi haree direta preokupasaun husi agrikultór sira kona-ba irrigasaun iha Bonuk, área suku Leolima ne’e.

“Rekomenda, konsidera iha planu orsamentu konstrusaun irrigasaun foun iha área Bonuk, tanba durante ne’e agrikultór sira sei halai natar ho sistema irrigasaun tradisionál,” haktuir relatóriu fiskalizasaun komisaun D ne’ebé Agência TATOLI asesu, tersa ne’e.

Tuir relatóriu fiskalizasaun komisaun nian haktuir, natar ne’e pertense ba área Bonuk ho totál ektare 500 maibé ektare 250 de’it mak agrikultór sira halo ba natar hodi kuda hare, tanba laiha kanál irrigasaun no bee la sufisiente.

Ho nune’e, agrikultór sira sujere atu konstrui irrigasaun foun hodi nune’e natar sira-ne’ebé abandonadu ne’e bele aproveita ho másimu.

Tuir agrikultór sira, iha tinan ne’e hare barak mak hetan estragu husi peste Nago no hetan ona intervensaun husi parte diresaun agrikultura munisípiu, maibé la konsege kombate peste hirak ne’e tanba aimoruk la sufisiente.

Iha ne’e agrikultór sira hato’o preokupasaun liga ho merkadu, tanba bainhira agrikultór sira prodús barak sira laiha serteza ho asesu ba merkadu hodi fa’an rezultadu produtu ne’ebé sira iha.

Nune’e, komisaun rekomenda ba MAPPF atu reativa ka reforsa programa “Povu Kuda Governu Sosa” hodi motiva agrikultór sira kontinua prodús.

Enkuantu, relatóriu fiskalizasaun ne’e, iha reuniaun plenária 07 Outubru 2024, meza PN halo distribuisaun no hato’o mós kópia ba Governu hodi bele tau atensaun.

Jornalista : Nelson de Sousa

Editór        : Cancio Ximenes

Publisidade

Leave a Reply

Latest Post

error: Content is protected !!