MAPPF presiza konstrui barajen protesaun ba natar iha Cassa-Ainaro

DILI, 08 outubru 2024 (TATOLI)—Komisaun D trata asuntu Ekonomia no Dezenvolvimentu iha Parlamentu Nasionál (PN) rekomenda ba Ministériu Agrikultura, Pekuária, Peska no Floresta (MAPPF) atu urjénsia konstrui barajen protesaun mota hodi bele salva natar iha área Luan-Kadoik, suku Cassa, munisípiu Ainaro.
Komisaun D, lideradu husi Prezidente Ricardo Baptista, akompañadu husi deputadu membru komisaun iha 10-12 jullu 2024 hala’o fiskalizasaun iha baze hodi haree direta preokupasaun husi agrikultór sira relasiona ho natar ne’ebé hetan estragu husi mota, iha área Luan-Kadoik, suku Cassa.
“Rekomenda, konsidera ho urjénsia konstrusaun barreira protesaun hodi bele salva natar sira iha área Cassa no mós salva intake irrigasaun Oe-Baba, tanba iha nafatin fatin barak ne’ebé hetan estragu husi mota, no sei ameasa mós intake irrigasaun Oe-baba,” haktuir relatóriu fiskalizasaun komisaun D ne’ebé Agência TATOLI asesu, tersa ne’e.
Tuir relatóriu fiskalizasaun ne’e katak, Deputadu sira vizita natar ne’ebé hetan estragu husi mota, iha área Luan-Kadoik, suku Cassa, no iha vizita ne’e observa katak natar barak mak hetan estragu husi mota no fatin hirak ne’e sai hanesan mota dalan.
Iha bibán ne’e, Diretora Servisu Munisipál Agrikultura Ainaro informa katak natar iha área Cassa ho totál ektare 130 maibé kuaze barak hetan estragu husi mota no natar ne’ebé abandona ne’e kuaze ektare 65.
Atu salva natar hirak ne’e presiza konstrui moru protesaun no mós hadi’a irrigasaun ne’ebé aat, tanba durante ne’e agrikultór sira halai natar ho sistema irrigasaun manuá, no kuaze tinan tolu (3) ona agrikultór sira la halai natar, tanba ta’uk hetan estragu husi mota.
Husi vizita ne’e bele observa katak, bainhira la konstrui moru protesaun, natar ne’ebé iha sei la halo no sei fó ameasa boot ba intake Oebaba, tanba estragu ne’ebé iha hahú husi parte leten no bainhira estragu luan no aumenta tan mak sei labele salva intake Oebaba.
Maiória natar iha parte mota ninin tinan ne’e la halo, maibé tinan sira antes ne’e kada tinan halo dala ida no rezultadu kolleta hare kada ektare ne’e bele atije tonelada 5,5.
Enkuantu, relatóriu fiskalizasaun ne’e, iha reuniaun plenária 07 Outubru 2024, meza PN halo distribuisaun no hato’o mós kópia ba Governu hodi bele tau atensaun.
Jornalista : Nelson de Sousa
Editór : Cancio Ximenes

