COVALIMA, 08 Outubru 2024 (TATOLI) – Sekretaria Estadu Kooperativa (SEKoop), liuhusi Departamentu Dezenvolvimentu Kooperativa fó formasaun bázika kona-ba lala’ok kona-ba estabelesimentu kooperativa ba Polísia Nasionál Timor-Leste (PNTL) no Asosiasaun Espoza PNTL Covalima.
Xefe Departamentu Dezenvolvimentu Kooperativa, Leonito Mendes Gonçalves, dehan formasaun bázika kona-ba oinsá loke kooperativa ne’e presiza iha koñesimentu sobre identidade kooperativa, dekretu-lei, sorumutu membru kooperativa, estrutura no siklu kontabilidade kooperativa nian.
Tanba ne’e, Governu disponibiliza formasaun bainhira membru PNTL sira iha inisiativa hakarak harii kooperativa ne’e sira iha ona koñesimentu báziku kona-ba regra oinsá atu loke kooperativa no bele halo jestaun hodi garante sustentabilidade iha futuru.
Kooperativa mak hanesan asosiasaun autónoma husi ema sira ne’ebé unidu ho voluntáriu hodi responde ba sira-nia nesesidade komún sira iha área ekonomia, sosiál no kultural, no responde ba sira-nia objetivu liuhusi sai na’in no kontrola hamutuk empreza ida.
Regra atu loke kooperativa mak presiza tuir formasaun bázika, iha fundu $1000 ba kada kooperativa, iha estrutura, estatutu, sede, aprezenta relatóriu ba SEKoop kada fulan atu halo avalisaun ba progresu no dezafiu sira.
Tuir dadus, SEKOOP rejista ona kooperativa hamutuk 230, husi númeru ne’e kooperativa kréditu 123 no sira seluk loke kooperativa produsaun ba produtu lokál sira.
Komandante PNTL Covalima, Superintendente Polísia Calisto Gonzaga, dehan, formasaun bázika kona-ba kooperativa bazeia ba proposta husi komando PNTL Covalima nian.
“Ha’u mak husu Sekretáriu Estadu Kooperativa atu fó formasaun ba PNTL no Asosiasaun Espoza PNTL sira atu iha koñesimentu kona-ba estabelese kooperativa”, dehan.
Formasaun ne’e partisipa husi membru PNTL Covalima na’in-15 no Asosiasaun Espoza Polísia Nasionál Timor-Leste na’in-lima.
Notísia relevante: SEKoop: Hasa’e kualidade grupu kooperativa sira iha TL liuhusi formasaun
Jornalista: Celestina Teles
Editora: Maria Auxiliadora
