PNTL investiga hela ema ida mate iha Vitoria Baucau
BAUCAU, 07 outubru 2024 (TATOLI) – Komandu Polísia Nasionál Timor-Leste (PNTL) munisípiu Baucau, investiga hela ema ida inisiál AGP lakon vida bainhira deskansa iha fatin penginapan Vitoria, Vila Antiga, Baucau Vila, munisípiu Baucau.
Xefe Servisu Investigasaun Kriminál PNTL Baucau, Sarjentu Xefe Bernadete Belo, esplika, matebian ho idade 62 to’o iha fatin referida ho intensaun atu deskansa iha meodia purvolta oras 12:00, no vítima hetan insidente purvolta oras 15:41, iha loron-domingu, 06 outumbru.
“Uma-na’in haree odamatan kuartu nakloke, entaun haree vítima latan iha rai ho kondisaun faru nakloke, uza kalsa badak ,” Xefe Investigasaun Kriminal PNTL Baucau hateten iha Vila Nova, segunda ne’e.
SIC Baucau hafoin simu informasaun husi família vítima, direitamente to’o iha fatin referida hodi kontinua halo identifikasaun iha lokál akontesimentu.
“Ita sei deskonfia hela, dala ruma ho feto ka ho ema seluk. Ita seidauk hatene,” Bernadete Belo akresenta.
PNTL Baucau hamutuk ho família iha ona konkordánsia hodi kontinua halo investigasaun liuhosi trasnporta isin-mate vitíma ba Ospitál Nasionál Guido Valadares (HNGV, sigla portugés) hodi halo autópsia.
Vitíma AGP halao knar iha Diresaun Terra no Propriedade Baucau nuudar funsionáriu publiku.
Jornalista : Natalino Belo
Editór : Evaristo Soares Martins
