DILI, 08 outubru 2024 (TATOLI)– Ekipa selesaun nasionál seniór Timor-Leste ho naran istimadu Lafaek susesu gaña vitoria dahuluk iha jogu kualufikasaun ASEAN Mitsubishi Eletric Cup bainhira kontra adversáriu Brunei Darusalam ho rezultadu 1-0.
Bainhira jogu la’o ekipa Timor-Leste halo presaun maka’as hasoru Brunei, nune’e Brunei mós la nonok halo responde ho defensivu, maibé Timor-Leste iha forsa ne’ebé naton hodi satan netik atake ne’ebé Brunei halo.
Ho forsa ne’ebé la diferente durante minutu primeira parte, laiha ekipa ida mak prodús golu no tenke termina ho empata 0-0.
Haka’at ba segunda parte jogu la’o manas liutan fó ona oporrunidade ba jogadór klube Indonézia PSIS Semarang ho naran, Paulo Gali Freitas lansa ona golu úniku muda rezultadu ba 1-0 iha minutu 47.
Ho vitória 1-0, klaru katak Timor-Leste iha vantajen bainhira joga iha jogu dala rua bainhira manán tan bele haka’at ba faze grupu. Jogu dala ruak husi playoff Tasa AFF 2024 nian sei hala’o iha Estádiu Chonburi, Bang Pla Soi, Tailándia, iha loron 15 fulan-outubru 2024.
Tasa AFF 2024 ne’e rasik sei hala’o iha loron 8 fulan-dezembru tinan 2024 to’o loron 5 fulan-janeiru tinan 2024. Iha ronde finál iha ekipa 10 ne’ebé fahe ba grupu rua no rezultadu sorteiu sira hala’o ona.
Timor-Leste ne’ebé manán playoff ne’e iha serteza atu tama iha Grupu A. Tuir mai, El Lafaek sei hasoru Tailándia, Malázia, Singapura no Kamboja.
Jornalista: Hortencio Sanchez
Editór: Florencio Miranda Ximenes
