CNE introdús prosesu eleisaun munisipál-podér lokál ba komunidade Babulu
VIQUEQUE, 09 outubru 2024 (TATOLI)-Komisaun Nasionál Eleisaun (CNE, sigla portugés), tersa ne’e, sosializa kona-ba eleisaun munisipál ba komunidade no joven eleitór foun sira iha suku Babulu, postu Uatulari, munisípiu Viqueque.
Biban ne’e, Komisáriu CNE destakadu munisípiu Viqueque, Olavio da Costa Montero Almeida, hateten, sosializasaun ne’e perioridade ba komunidade no eleitór foun hodi partilla ba sira atu bele kompriende.
Kona-ba eleisaun munisipál bazeia lei munisípiu ne’ebé hetan aprovasaun iha tinan kotuk hanesan lei númeru 22/2021, kona-ba lei eleitorál no lei númeru 23/2021 kona-ba lei podér lokál no desentralizasaun administrativa.
“Ami mai suku Babulu hodi introdús eleisaun munisipál nian tanba Governu tarjetu eleisaun referida sei iha tinan 2025-2026. Komunidade no foinsa’e ne’ebé hela iha suku ida-ne’e izoldu nune’e presiza fahe informasaun sira-ne’e, atu sira bele hatene prosesu kona-ba eleisaun munisipál”, Komisáriu CNE destakadu munisípiu Viqueque, hateten ba jornalista sira, hafoin ramata abertura eduksaun sivika, iha sede suku Babulu, ohin.
Iha fatin hanesan, Xefe suku Babulu, Mario Trindade, husu agradese ba CNE ne’ebé fahe infomasaun kona-ba eleisaun podér lokál nian ba komunidade no joven idade 17 sira, atu eleisaun podér lokál akontese karik sira bele partisipa iha eleisaun.
“Sosializasaun ida-ne’e sai importante ba ita-nia joven sira tanba joven sira-ne’e sai eleitór foun. Atu sira mós bele iha koñesementu ba prosesu eleisaun ba podér lokál. Tan ne’e, ha’u husu joven sira sira tau atensaun ba edukasaun votante ne’ebé CNE partilla”, nia hato’o.
Eleitór foun bele trata eleitorál
Reprezentante Administradór Postu Viqueque Vila, munisípiu Viqueque, Juvinal Mascarinhas, husu ba estudante sira-ne’ebé idade 17 atu komesa trata kartaun eleitorál hodi partisipa iha eleisaun.
“Ohin loron ita-nia orgaun Komisaun Nasionál Eleisaun (CNE, sigla portugés) hahú halo sensiblizasaun. Tanba ne’e ba estudante sira-ne’ebé seidauk ih kartaun eleitorál, ha’u husu estudante to’o ona idade 16 to’o 17 tenke trata kartaun eletorál hodi ezerse diretu, karik akontese eleisaun munisipál”, nia sujere.
Alende ne’e nia husu estudante sira atu habelar informasaun ba família no kolega sira trata kartaun eleitorál hodi hasa’e taxa partisipasaun eleisaun iha munisípiu Viqueque.
Komisáriu CNE destakadu munisípiu Viqueque, mós reforsa atu estudante Sekundáriu Jerál Calixa Viqueque Vila bele trata kartaun eleitorál hodi tuir eleisaun munisipál.
“Estudante sira partisipa la’ós simu de’it, maibé estudante sira sai mós portavóz hodi fahe ba sira-nia maluk estudante sira kona-ba ita-nia preparasaun ba eleisaun munisipál”, Komisáriu CNE ne’e akresenta.
Entretantu, Estudante ESG Calixa klase 2, Nefifania Soares Amaral Pinto Pires Soares, sente orgullu no agradese ba ekipa CNE ne’ebé oferese ona edukasaun sivika kona-ba eleisaun munisipál.
“Ami hakarak CNE nafatin kapasita no kaderniza ami-nia hodi bele partisipa votasaun ho di’ak. Difikuldade ne’ebé ami hasoru maka trata kartaun eleitorál, estudante balun idade to’o, maibé sira laiha kartaun eleitorál sistema trata dokumentu sertidaun, sertidaun moris no Billete identidade, prosesu naruk hafoin hetan kartaun eleitorál. Nune’e ami husu ba parte relevante sira hafasil sistema, atu sidadaun sira fasil hetan kartaun eleitorál”, nia sujere.
Jornalista : Vitorino Lopes da Costa
Editór : Florencio Miranda Ximenes
