OÉ-CUSSE, 09 Outubru 2024 (TATOLI) – Populasaun sira iha aldeia Oébaha, suku Bobometo, sub-rejiaun Oésilo, husu ba Prezidente Autoridade Rejiaun Administrativa Espesiál Oé-Cusse Ambeno (RAEOA), Rogério Tiago Lobato, atu kumpre nia promesa hodi harii ponte ida iha bairru Paut, nune’e bele fasilita movimentu ema no transporte, liuliu iha tempu udan.
“Foin daudaun inaugura saudozu Horácio Tabes nia estátua, prezidente autoridade rasik mak ko’alia tinan ne’e tenke halo ponte, tanba ne’e mota boot, ema husi mota sorin no husi ne’e bá suku Usitasa’e, Ban-Afi mós tenke asesu estrada ne’e. Prezidente autoridade ko’alia tiha ona, tenke halo para ema bele hakat ho di’ak, tanba bainhira udan, mota lori ema ne’e Governu mo’e ka la’e”, abitante José Loka preokupa iha Oébaha.
Notísia relevante: Rogério Lobato orienta DRI prepara BoQ hodi konstrui ponte iha Oébaha
Lian-na’in aldeia Oébaha ne’e dehan bainhira pronte Oébaha konstrui sei fasilita komunidade husi sub-rejiaun Pássabe no Oésilo bele transporta produtu lokál bá merkadu. “Kuandu halo duni ponte ne’e, ami kontente tebes ba prezidente”, nia realsa.
Foto Tatoli/Abílio Elo Nini
Xefe aldeia Oébaha, Marcelino Ole, dehan importante tebes harii ponte iha Oébaha, nune’e bele tulun komunidade ultrapasa bainhira iha tempu udan.
“Nia sei halo duni, tanba promete ona, maibé kuandu promesa la realiza, ami hanesan autoridade lokál labele foti desizaun ba ida-ne’e, ne’ebé ami fiar sei halo”, nia espera.
Notísia relevante: RAEOA reabilita estrada rejionál Oebaha liga ponte Bitopa ho kustu rihun $544-resin
Jornalista Tatoli tenta konfirma ho Prezidente Autoridade RAEOA, Rogério Tiago Lobato, maibé laiha fatin tanba daudaun ne’e hala’o hela serbisu iha Díli.
Rekorde katak Prezidente Autoridade RAEOA hato’o nia promesa ba komunidade sira bainhira partisipa iha inaugurasaun estátua matebian Horácio Tabes iha aldeia Oébaha foin lalais ne’e.
Prezidente ne’e husu ba Diresaun Rejionál ba Infraestrutura atu dudu moos mota laran sira halo kabeer no halo proposta hodi harii ponte ida iha Oébaha. “Halo proposta ida mai ha’u bele aprova”, nia dehan iha inaugurasaun estátua ne’e.
Notísia relevante: Autoridade RAEOA inaugura ponte Bitopa fasilita komunidade sub-rejiaun tolu
Aldeia Oébaha nu’udar dalan alternativa ba movimentu transporte no komunidade hodi halo ligasaun husi sub-rejiaun Oésilo no Pássabe atu asesu bá sub-rejiaun Pante Makasar, Oé-Cusse Vila.
Jornalista: Abílio Elo Nini
Editora: Maria Auxiliadora
