BAUCAU, 08 outubru 2024 (TATOLI) – Governu liuhusi Ministériu Saúde, tersa ne’e, realiza workshop nassionál ho tema hakbiit saúde materna infantil iha Munisípiu Baucau.
Vise Ministru Saúde Asuntu ba Fortalesementu Institusionál, José dos Reis Magno, esplika workshop referida realiza hamutuk liuhusi kooperasaun entre MS ho Organizasaun Saúde Mundiál ne’ebé ho objetivu atu avalia saúde feto nível nasionál hanesan materna infantil ne’ebé parte husi serbisu semestrál diresaun nasional saude inan no oan.
“Workshop ne’e atu avalia fali planu ne’ebé defenidu ona, agora atu haree programa nia atinjimentu no haree nia dezafiu,” Vise Ministru Saúde hateten iha Sentru Konvensaun Baucau (CCB, sigla ñortugés) Vila Antiga.
Ministériu Saúde hamutuk ho OMS konvida dirijente saúde hotu iha territóriu nasionál hodi akompaña atinjimentu programa saúde inan inklui dezafiu hotu ne’ebé implementa ona husi tinan 2023 to’o inísiu tinan 2024.
Timor-Leste husi inisiu livre husi okupasaun enfrenta dezafiu boot iha setór saúde, tanba tuir dadus taxa mortalidade inan atinji 670/100.00, nune’e Governu halo esforsu no to’o agora tuir dadus atinji 195/100.00 no saúde oan atinji 20/100.00.
Dezempeñu ne’e la’ós extraordináriu ba XI Governu Konstitusional, maibé ne’e esforsu maka’as husi Timor oan hotu ba koperasaun ho parseiru saúde nian iha Timor-Leste.
Timor Leste nu’udar nasaun ne’ebé ho ninia setór saúde ne’ebé neneik, maibé konsege atinji MGD 58 husi nasaun 80 iha sudeste aziátiku.
Dadus referida bazea ba rezultadu peksiza demografia saúde ne’ebé relata iha tinan 2016 no kauza mortalidade inan mate.
“Situasaun ita bele mellora, Governu sentrál husu nafatin atu serbisu maka’as liután nune’e situasaun ne’e bele hadi’a,” Jose Magno akresenta.
Jornalista : Natalino Belo
Editór : Evaristo Soares Martins
