DILI, 09 outubru 2024 (TATOLI) – Prezidente Repúblika, José Ramos-Horta hateten, Timor-Leste nia rekonsiliasaun ho Indonézia nu’udar modelu estraordináriu ba mundu, hodi hatudu nasaun ne’e nia abilidade atu harii relasaun internasionál sira ne’ebé metin hafoin nia referendum iha tinan 1999.
Ramos-Horta relata asuntu ne’e bainhira dirije Klubu Nasionál Imprensa Austrália nian, kuarta ne’e, iha Austrália, hodi destaka nasaun ninia progresu notável dezde hetan independénsia iha tinan 2002.
Tuir Horta, Timor-Leste nia kompromisu ba demokrásia, liberdade imprensa, no toleránsia relijioza hetan énfaze, nune’e orgullu katak nasaun nia klasifikasaun iha área sira-ne’e ultrapasa nasaun barak seluk, hodi koloka Timor-Leste nu’udar sinál ba progresu iha komunidade internasionál.
“Progresu signifikativu iha setór oioin. Setór saúde haree ona aumentu substansiál iha profisionál médiku sira, ho númeru médiku sira ne’ebé aumenta barak iha 2002 ba liu rihun ida ohin loron, agradese iha parte ida ba asisténsia kubanu. Timor-Leste mós hatudu progresu ba asesu ba eletrisidade, ho kobertura besik 98% hosi populasaun,” tenik Horta iha nota ne’ebé Agência TATOLI asesu hosi media Prezidensiál.
Iha nota ne’e Horta tenik tan, edukasaun halo progresu impresionante, ho númeru Timoroan sira ne’ebé hetan titlu doutoramentu husi instituisaun prestijiadu sira iha mundu tomak ne’ebé aumenta ba beibeik.
Prezidente Horta mós nota melloria sira iha indikadór ekonómiku sira, taxa dezempregu ne’ebé tun, no maximiza konetividade aérea no terrestre nasionál.
Jornalista: Hortencio Sanchez
Editór: Florencio Miranda Ximenes
