BAUKAU, 17 Juñu 2026 (TATOLI)—Autoridade Munisipál Baukau (AMB) husu Ministériu Obra Públika (MOP) atu responde kondisaun estrada ne’ebé hetan estragu kauza husi inundasaun iha territóriu Baukau.
Prezidente Autóridade Munisipál (PAM) Baukau, Veneranda Eurico Lemos Martins, esplika AMB liuhusi Serbisu Munisipál Obra Públika relata ona relatóriu kona-ba estrada hirak-ne’ebé hetan estragu tanba laiha kapasidade no kompeténsia atu responde ho urjente ligadu kondisaun estrada.
“Estrada lubuk iha Abu no Postu Baukau Vila ne’ebé hatudu katak parte nasionál tenke tau-atensaun,” Veneranda Lemos hateten iha Salaun Apuramentu Administrasaun Munisipál Vila Nova, Kuarta ne’e.
Eis deputada ne’e relata estrada, ponte no drenajen ne’ebé hetan estragu kauza husi udan no rai-halai lokaliza iha Suku Haekoni, Postu Administrativu Baguia, Abu, Postu Kelikai, Buruma no Bukoli, Postu Baukau Vila ne’ebé konsideradu presiza hetan atensaun tanba inportante ba komunidade hodi transporta produtu ba merkadu.
Tuir kompeténsia, estrada ne’ebé estragu kategoriza responsabilidade husi nasionál tanba maioria estrada nasionál ho distánsia kilómetru 10 to’o 50 iha-ne’ebé AMB rasik laiha kapasidade finanseira atu responde ho urjente.
“Kapasidade orsamentu munisipál nian mak la to’o. Espera katak tékniku obra públika husi nasionál fó lalais solusaun ba kestaun sira-ne’e,” Veneranda Lemos akresenta.
Nia rekoñese kondisaun infraestrutura estrada no ponte kuandu estragu difikulta movimentasaun transporte no afeta ba rendimentu ekonomia komunidade iha área rurál maibé nafatin apresia ba komunidade iha Haekoni ne’ebé ho inisiativa rasik hadi’a estrada iha mota Basarwai.
Entertantu, Serbisu Munisipál Obra Públika Baukau indetifika estrada nasinál iha área Baukau hamutuk pontu lima mak estragu hanesan diresaun Baukau bá Lautein lokaliza iha Suku Buruma hamutuk pontu haat kompostu Komuloli, Kaisahe, Daeisi, Doko Bere no diresaun Baukau bá Dili iha pontu ida-ne’ebé lokaliza iha área Luliheni, Suku Bukoli.
Jornalista: Natalino Belo
Editór: Xisto da Piedade Freitas
