DILI, 10 outubru 2024 (TATOLI)—Dosente 15 husi Institute of Business (IOB) daudaun ne’e kontinua estudu iha nível mestradu no doutoramentu iha Portugal, Brazíl no Indonézia.
“Sira kuandu filafali mai, bele iha kualidade ne’ebé mak di’ak atu hanorin estudante sira,” Reitór IOB, Pedro Barreto Ximenes, hato’o ba Agência Tatoli iha ninia knaar fatin, Fomento, kinta ne’e.
Dosente sira-ne’e hala’o estudu iha área ekonomia negósiu, turizmu no ospitalidade no informasaun komunikasaun no teknolojia.
Iha parte seluk, Reitór orgullu tanba IOB hetan ona akreditasaun institusionál husi Ajénsia Nasionál Avaliasaun Akreditasaun Akadémika (ANAAA) ho valór di’ak.
“Liga ho kualidade, IOB hetan ona akreditasaun husi Governu Timor-Leste no IOB nia akreditasaun institusionál ne’e ami hetan valór A, ida-ne’e rekoñesimentu husi Governu Timor-Leste. Ami-nia programa sira hetan hotu ona akreditasaun husi Governu, balun hetan A, B no C, ne’ebé atu dehan katak ida-ne’e iha avansu maibé ami mós rekoñese katak iha mós dezafiu, ne’ebé mak ami presiza atu responde ba, hanesan limitadu ein termu rekursu umanu, entaun ita tenke haruka dosente sira bá eskola iha li’ur,” nia akresenta.
Notísia relevante : IOB halo kooperasaun ho universidade hitu iha Portugal
Totál dosente ne’ebé mak dadaun ne’e hanorin iha IOB hamutuk 120, ne’ebé husi númeru ne’e kuaze maioria ho grau akadémiku mestradu no doutoramentu.
“Se ita ko’alia 60% ne’e husi 120, iha dosente 70 mak ho grau mestradu no doutoramentu, ita sei iha dezafiu tanba iha dosente 40-resin ho grau akadémiku lisensiatura, maibé maioria grau lisensiatura sira-ne’e mós hanorin iha programa sira ne’ebé mak iha diploma 1, 2 no 3, ne’e tanba lisensiatura ne’e sei bele hanorin iha diploma sira-ne’e,” Reitór esplika.
Enkuantu, estudante ne’ebé daudaun ativu iha institutu ensinu superiór privada ne’e hamutuk 4.400, ne’ebé númeru ne’e inklui ona ho estudante iha Maliana.
Jornalista : Osória Marques
Editora : Julia Chatarina
