DILI, 10 outubru 2024 (TATOLI) – Ministériu Juventude, Desportu, Arte, no Kultura (MJDAK), liuhusi Diresaun Jerál Juventude no Diresaun Nasionál Dezenvolvimentu Juventude, anunsiu ona ba tinan ida ne’e aloka orsamentu $100.000 ba selebrasaun loron Nasionál Juventude no Masakre Santa Cruz.
Diretór Jerál MJDAK, David Tomas de Deus, dehan, formasaun Komisaun Organizadora konjunta hodi tau matan ba atividade hotu ne’ebé relasiona ho selebrasaun Loron Nasionál Juventude nian. Komité ne’e sei inklui organizasaun juventude sira iha parseria ho MJDAK.
“Orsamentu referidu inklui $30.000 ba selebrasaun Loron Nasionál Juventude iha Dili, $2.070 ba komemorasaun Masakre Santa Cruz, no $47.300 ba komemorasaun Loron Nasionál Juventude no Masakre Santa Cruz iha postu administrativu hotu-hotu,” tenik Diretór ne’e liuhUsi nota ne’ebé TATOLI asesu hosi media MJDAK, ohin.
Eventu ne’e sei oferese oportunidade ba juventude, sosiedade sivíl, no parte interesada oioin, inklui eis-membru rezisténsia juventude sira, atu troka perspetiva kona-ba dezenvolvimentu juventude.
Diskusaun sira sei foka ba rekomendasaun no asaun sira relasiona ho Polítika Nasionál Juventude nian, Planu Asaun Nasionál Juventude nian, no ninia implementasaun.
Atividade sira ne’ebé planeia ona inklui semináriu sira, diskusaun painél sira, kompetisaun sira diskursu nian iha públiku, debate sira, kompetisaun banda bateria nian, talk show sira, feira nasionál ida ba foin-sa’e sira, paseiu ba foin-sa’e sira, no vizita entre relijiaun sira.
Partisipante sira hosi enkontru ne’e inklui reprezentante husi organizasaun sira hanesan Sentru Labarik no Foin-sa’e Comoro (CCYC), Uniaun Nasionál Eskuteiru Timor-Leste (UNE-TL), Juventude Hadomi Natureza (JHN), Konsellu Nasionál Juventude Timor-Leste (CNJTL ), Aliansa Nasionál Kontrolu Tabaku iha Timor-Leste (ANCT-TL), no Asosiasaun Defisiénsia Timor-Leste (ADTL).
Prezidente CNJTL, Maria Dadi Soares Magno, propoin unifika komemorasaun rua ne’ebé ketak ba Loron Nasionál Juventude sai eventu ida de’it ne’ebé koezivu.
“Ami hala’o tipu atividade rua: selebrasaun Loron Nasionál Juventude nian, no komemorasaun, ne’ebé fó onra ba kontribuisaun sira hosi ami nia juventude sira ba nasaun nia independénsia,” Magno hateten.
Magno mós destaka signifikasaun hosi tema sentrál ne’ebé prepara hosi komisaun organizadora. Nia sujere katak semináriu sira tenke inklui diskusaun painél sira kona-ba polítika juventude nian, ho kontribuisaun sira hosi ofisiál governu nian no sosiedade sivíl, enkuantu aborda mós kestaun sosiál sira ne’ebé afeta juventude.
Aprosimasaun ida-ne’e hakarak atu hamosu rekomendasaun sira ne’ebé signifikativu no asaun konkretu sira.
Enkontru ne’e konklui ho kompromisu ne’ebé reforsa husi parseiru hotu-hotu atu servisu hamutuk hodi garante susesu husi selebrasaun nasionál importante ida ne’e, hodi reflete kona-ba kontribuisaun pasadu, prezente, no futuru juventude Timor-Leste nian.
Jornalista: Hortencio Sanchez
Editor: Florencio Miranda Ximenes
